Tesla раҳбари Илон Маск бош директор унвонига компаниянинг «техноқироли» унвонини қўшиб қўйди. Бу ҳақда Financial Times нашрига таяниб «РБК» хабар берди.
Компания расман Илон Маск Technoking of Tesla «унвони»ни олгани ҳақида АҚШнинг қимматли қоғозлар бўйича комиссиясига (SEC) юборилган хабарномада эълон қилди.
Шунингдек, хабарномада Tesla’нинг молиявий директори Зак Кирхорн Master of Coin қўшимча «унвони»ни олгани айтилган. «Тахтлар ўйини» сериалида Master of Coin унвони етти қиролликнинг ғазнасини юритувчи Петир Бэйлиш ва Тирион Ланнистерга берилади.
Кирхорннинг янги лавозими номини танлаш сериал билан боғлиқми ёки йўқми, номаълум. Маск ўзининг «тож кийдириш маросими»га ҳам ҳали изоҳ бермади.
Илон Маск ҳазилга бўлган мойиллиги билан ҳам танилган, унинг баъзи ҳазиллари ҳатто алоҳида «бизнес-лойиҳалар»га айланган. Мисол учун, 2020 йилда Tesla’нинг онлайн дўконида қизил шортилар (Tesla short shorts) сотувга қўйилди. Унинг савдога чиқарилиши Tesla акцияларининг пасайишини кутиб, қисқа позицияларни (short) очган акциядорларнинг устидан масхарага айланди.
2020 йилнинг ноябрь ойида Tesla сайтида ўз бренди остида текила сота бошлади. Tesla Tequila чақмоқ шаклидаги шишасининг 750 миллилитри 250 долларга сотилди. Аввалроқ Маск «теслакила»ни 1 апрель хабарида Tesla’нинг банкротлиги тўғрисидаги эълонда айтиб ўтган эди.
2020 йилда Маск ўғлига ХÆА-12 деб исм қўйди. Кейинчалик боланинг онаси исмни танлашни Lockheed А-12 самолётига бўлган меҳри билан изоҳлади.
Аввалроқ Tesla электромобил компаниясининг инвестори компаниянинг асосчиси ва бош директори ва директорлар кенгаши устидан Делавер штати судига шикоят аризаси киритди. Инвесторнинг айтишича, Маск ўзининг твитлари орқали 2018 йилда АҚШнинг қимматли қоғозлар бўйича комиссияси (SEC) билан тузилган шартнома шартларини бузмоқда. Унга кўра, Маск биринчи навбатда ижтимоий тармоқларда ўз ҳаракатларини мувофиқлаштириши керак.
Изоҳ (0)