Tesla va SpaceX asoschisi Ilon Mask AQShning Texas shtatida yangi shahar yaratish rejalarini e’lon qildi. Bu haqda tadbirkor Twitter’da yozdi, deb xabar beradi “RBK”.
Foto: Global Look Press
“Texasda Starbeys shahrini yaratyapman” — deya tvit qoldirgan Ilon Mask.
Bloomberg xabariga ko‘ra, gap SpaceX korporatsiyasining Texasdagi raketa uchirish maydonchasi joylashgan Boka-Chika qishlog‘i nomini o‘zgartirish haqida ketmoqda. Nashrning yozishicha, o‘tgan hafta mahalliy qonunlarga ko‘ra, hudud nomini o‘zgartirish taklifini ma’qullashi kerak bo‘lgan Kameron okrugining sudyasi Eddi Trevino hali kompaniyadan tegishli so‘rovni olmaganini aytgan edi.
CNBC agentligi 2020-yilning dekabrida Maskning Kremniy vodiysidan Texasga ko‘chib o‘tishi haqida xabar bergan. Bundan oldin tadbirkor Kaliforniyadagi koronavirus pandemiyasi bilan bog‘liq cheklovlarni tanqid qilgan va u Texasda faoliyatini kuchaytirishga tayyorligini ta’kidlagan. Dekabr oyining boshida Mask Kaliforniyadagi mulkini sotuvga qo‘ygan. O‘shanda u “mol-mulk odamni pastga tortishi”ni aytgan edi.
Bundan tashqari, 2020-yil iyul oyida Tesla asoschisi Texasda elektromobillar ishlab chiqaradigan yangi zavod qurilishi haqida e’lon qilgan edi. Zavodda Cybertruck elektr yuk mashinalari va tirkamalarini hamda AQShning sharqiy qismidagi mijozlar uchun Model 3 va Model Y elektromobillari yig‘ilishi rejalashtirilgan. Texas shtati gubernatori Greg Ebbott CNBC telekanalida Maskning shtatda zavod qurishga qaror qilganini ta’kidladi, chunki bu unga o‘z faoliyatini istalgancha kengaytirish erkinligini beradi.
Eslatib o‘tamiz, fevral oyi oxirida Ilon Mask Tesla aksiyalarining narxi tushishi oqibatida bir kunda 14 milliard dollar yo‘qotdi.
Bu yo‘qotishdan keyin hozirda Maskning boyligi 176 milliard dollarni tashkil qilmoqda. Lekin tadbirkor hozir ham dunyoning eng boy kishilari ro‘yxatida ikkinchi pog‘onani band qilib turibdi.
Bungacha ham Ilon Mask bir kecha kunduzda 15 milliard dollarni boy bergan edi. Bu yo‘qotishga ham Tesla aksiyalari narxining tushib ketishi sabab bo‘lgan.
