AQSh prezidenti Jo Bayden mamlakatda soliqlarni 1993-yildan buyon eng yirik hajmda oshirishni rejalashtirmoqda. Bu haqda Bloomberg xabar berdi.
Ushbu tadbir davlatning 1,9 trillion dollarlik uchinchi yordam paketidan keyin uzoq muddatli iqtisodiy dasturni moliyalashtirish uchun zarur. Gap 2020-yilgi saylovlarda Baydenning prezidentlik dasturida ko‘zda tutilgan soliq o‘sishi haqida ketmoqda, deyiladi Bloomberg manbalarida. Unga ko‘ra, Bayden avvalgi prezident Donald Trampning 2017-yilda qabul qilgan korporatsiyalar va badavlat odamlarga imtiyozlar berish haqidagi qonunini qisman bekor qiladi. Ushbu va boshqa tuzatishlar bilan Bayden soliq kodeksini yanada ilg‘or qilishga intilmoqda, deya izohladi.
Muhokama qilingan chora-tadbirlar orasida yuridik shaxslar uchun soliqni 21 foizdan 28 foizgacha oshirish, mas’uliyati cheklangan jamiyatlar (MChJ) uchun soliq imtiyozlarini bekor qilish, shuningdek, 400 ming dollardan ortiq daromad oladigan fuqarolar uchun daromad solig‘ini oshirish ta’kidlandi. Bundan tashqari, yillik daromadi kamida 1 million dollarni tashkil qiladigan kishilar uchun kapitaldan olinadigan soliq stavkasini oshirish muhokama qilinmoqda.
2020-yil noyabr oyida Tax policy center tahlil markazi Bayden tomonidan saylovoldi tashviqoti paytida taklif qilingan chora-tadbirlar budjetga o‘n yil ichida 2,1 trillion dollar olib keladi, deb baholagandi. Bayden ma’muriyatining hozirgi rejasi soddaroq, deb ta’kidlaydi Bloomberg. Ekspetlar fikriga ko‘ra, Baydenning iqtisodiy dasturining umumiy hajmi 2 trillion dollardan 4 trillion dollargacha yetadi.
Agentlik ma’lumotlariga ko‘ra, demokratlar soliqni oshirish haqidagi qarorni Senatda tasdiqlatish uchun kamida 10 respublikachining ovoziga muhtoj. Qonun loyihasi Baydenning ikkala tomonni kelishuvda ushlab turish qobiliyatini sinovdan o‘tkazadi, dedi Bloomberg.
Eslatib o‘tamiz, AQSh Kongressi Amerika iqtisodiyotini qo‘llab-quvvatlash uchun 1,9 trillion dollarlik rejani ma’qullagan, unga ko‘ra, aksariyat amerikaliklarga 1400 dollar miqdorida to‘g‘ridan to‘g‘ri to‘lovlar amalga oshiriladi. Iqtisodiy qo‘llab-quvvatlash rejasi, boshqa masalalar qatorida, 400 milliard dollar ajratishni nazarda tutadi, bu mablag‘ Amerikaning aksariyat aholisiga yo‘naltiriladi. Bundan tashqari, rejaga ko‘ra, haftasiga 300 dollar miqdoridagi ishsizlik nafaqasini to‘lab berish sentabr oyining boshiga qadar uzaytiriladi.
Shuningdek, 2020-yilning dekabr oyida AQSh Kongressi qariyb 900 milliard dollarlik iqtisodiy yordam paketi doirasida ko‘plab amerikaliklarga to‘g‘ridan to‘g‘ri 600 dollardan to‘lab berishni ma’qullagan edi.
Izoh (0)