Qozog‘iston poytaxtida 18-martdan karantin choralari kuchaytiriladi, Navro‘z kuni esa lokdaun e’lon qilinadi

Qozog‘iston poytaxti Nur-Sultonda 18-martdan cheklov va karantin choralari kuchaytiriladi, deb xabar bermoqda Tengrinews. Shahar bosh davlat sanitar shifokori Sarxat Beysenova tegishli qarorni imzolagan.

Ommaviy tadbirlar, shu jumladan, oilaviy marosimlar va ma’rakalar, shuningdek, uyda tashkillashtiriladigan ziyofatlar, to‘ylar, yubileylar, ma’rakalarni o‘tkazish va ularda qatnashish, bundan tashqari, bayram korporativlari, mitinglar, namoyishlar, yig‘inlar tashkillashtirish va o‘tkazish taqiqlandi.

Faoliyati tiklanmagan obyektlar: bouling markazlari, kompyuter klublari (Ashyq sinov loyihasida qatnashayotgan obyektlardan tashqari), kinoteatrlar, kinorumlar, bilyardxonalar, karaoke, batutlar, tungi klublar, bukmekerlik idoralari va o‘yin klublari, yopiq inshootlardagi o‘yin maydonlari va attraksionlar, muz va rolik yaxmalaklari (sport obyektlaridagidan tashqari)ga borish taqiqlanadi.

Ashyq sinov loyihasida qatnashayotgan tadbirkorlik obyektlariga kirish uchun Ashyq mobil dasturidan foydalanish zarur, uni App Store va Play Market do‘konlaridan yuklab olish mumkin.

Jamoat joylariga, shu jumladan, shahar jamoat transporti hamda faoliyatiga ruxsat berilgan obyektlarga tashrif buyurganda, shuningdek, ochiq havodagi jamoat joylarida bo‘lgan vaqtda niqob taqish, masofa saqlash va antiseptiklardan foydalanish talablariga qat’iy rioya qilish shart.

Hujjat 2021-yil 18-mart kunidan kuchga kiradi.

21-mart kuni esa Nur-Sultonda lokdaun e’lon qilindi. “Nur-Sulton ‘qizil’ zonada ekanini hisobga olib, dam olish kuni — 21-mart (yakshanba)da shaharda lokdaun joriy qilinadi. Shu kuni savdo markazlari, yopiq nooziq-ovqat bozorlari, yopiq sport obyektlarining ishlashi taqiqlanadi.

Shuningdek, yakshanba kuni jamoat transporti harakati ham to‘xtatiladi: dezinfeksiya ishlari olib boriladi.

“Shahardagi epidemiologik vaziyat beqaror. O‘tgan bayram kunlari koronavirus ko‘rsatkichlari har kuni o‘sganini ko‘rsardi. Navro‘z bayrami munosabati bilan ommaviy tadbirlar o‘tkazish taqiqlanadi. O‘sish davom etishiga yo‘l qo‘yib bo‘lmaydi”, — dedi Nur-Sulton bosh sanitar shifokori Sarxat Beysenova.

Qozog‘istonda o‘tgan bir kecha-kunduzda 954 kishida koronavirus aniqlangan, shularning 297 nafari Olmaota, 127 nafari Nur-Sultonda qayd etilgan. Mamlakatda kasallanganlarning umumiy soni 225 685 kishiga yetdi.

Avvalroq Qozog‘istonda Navro‘z bayramini 10 kun nishonlash taklif etilgan, Navro‘z bayramini nishonlash konsepsiyasini tasdiqlash to‘g‘risida qaror loyihasi jamoatchilik muhokamasi uchun e’lon qilingan edi.