АҚШ президенти Жо Байден мамлакатда солиқларни 1993 йилдан буён энг йирик ҳажмда оширишни режалаштирмоқда. Бу ҳақда Bloomberg хабар берди.
Ушбу тадбир давлатнинг 1,9 триллион долларлик учинчи ёрдам пакетидан кейин узоқ муддатли иқтисодий дастурни молиялаштириш учун зарур. Гап 2020 йилги сайловларда Байденнинг президентлик дастурида кўзда тутилган солиқ ўсиши ҳақида кетмоқда, дейилади Bloomberg манбаларида. Унга кўра, Байден аввалги президент Дональд Трампнинг 2017 йилда қабул қилган корпорациялар ва бадавлат одамларга имтиёзлар бериш ҳақидаги қонунини қисман бекор қилади. Ушбу ва бошқа тузатишлар билан Байден солиқ кодексини янада илғор қилишга интилмоқда, дея изоҳлади.
Муҳокама қилинган чора-тадбирлар орасида юридик шахслар учун солиқни 21 фоиздан 28 фоизгача ошириш, масъулияти чекланган жамиятлар (МЧЖ) учун солиқ имтиёзларини бекор қилиш, шунингдек, 400 минг доллардан ортиқ даромад оладиган фуқаролар учун даромад солиғини ошириш таъкидланди. Бундан ташқари, йиллик даромади камида 1 миллион долларни ташкил қиладиган кишилар учун капиталдан олинадиган солиқ ставкасини ошириш муҳокама қилинмоқда.
2020 йил ноябрь ойида Tax policy center таҳлил маркази Байден томонидан сайловолди ташвиқоти пайтида таклиф қилинган чора-тадбирлар бюджетга ўн йил ичида 2,1 триллион доллар олиб келади, деб баҳолаганди. Байден маъмуриятининг ҳозирги режаси соддароқ, деб таъкидлайди Bloomberg. Экспетлар фикрига кўра, Байденнинг иқтисодий дастурининг умумий ҳажми 2 триллион доллардан 4 триллион долларгача етади.
Агентлик маълумотларига кўра, демократлар солиқни ошириш ҳақидаги қарорни Сенатда тасдиқлатиш учун камида 10 республикачининг овозига муҳтож. Қонун лойиҳаси Байденнинг иккала томонни келишувда ушлаб туриш қобилиятини синовдан ўтказади, деди Bloomberg.
Эслатиб ўтамиз, АҚШ Конгресси Америка иқтисодиётини қўллаб-қувватлаш учун 1,9 триллион долларлик режани маъқуллаган, унга кўра, аксарият америкаликларга 1400 доллар миқдорида тўғридан-тўғри тўловлар амалга оширилади. Иқтисодий қўллаб-қувватлаш режаси, бошқа масалалар қаторида, 400 миллиард доллар ажратишни назарда тутади, бу маблағ Американинг аксарият аҳолисига йўналтирилади. Бундан ташқари, режага кўра, ҳафтасига 300 доллар миқдоридаги ишсизлик нафақасини тўлаб бериш сентябрь ойининг бошига қадар узайтирилади.
Шунингдек, 2020 йилнинг декабрь ойида АҚШ Конгресси қарийб 900 миллиард долларлик иқтисодий ёрдам пакети доирасида кўплаб америкаликларга тўғридан-тўғри 600 доллардан тўлаб беришни маъқуллаган эди.
Изоҳ (0)