Rossiya prezidenti Vladimir Putin ilm-fan va ta’lim bo‘yicha kengashning yangi tarkibini tasdiqladi. Bu haqidagi Rossiya prezidentining farmoni huquqiy axborot beruvchi mamlakat internet-portalida e’lon qilingan.
Vladimir Putinning o‘zi mazkur kengashning raisi hisoblanadi. Unga o‘rinbosar etib sobiq bosh vazir, sobiq prezident va ayni vaqtda Rossiya xavfsizlik kengashi raisining o‘rinbosari lavozimida ishlab kelayotgan Dmitriy Medvedev tayinlangan.
Putinning ilm-fan va ta’lim kengashidagi avvalgi muovini – Andrey Fursenko — mazkur kengashning kotibi lavozimiga o‘tkazilgan.
Rossiya prezidenti huzuridagi Ilm-fan va ta’lim kengashi maslahatlashuv organi hisoblanadi. Uning asosiy vazifalari mamlakatda ilm-fan va texnika sohasini yanada rivojlantirish bo‘yicha asosiy strategik maqsadlarni belgilab olishdan iborat.
Avval 2-mart kuni Vladimir Putin Sovet ittifoqining birinchi va yagona prezidenti, Ijtimoiy-iqtisodiy va siyosiy tadqiqotlar xalqaro jamoat fondi prezidenti Mixail Gorbachyovni 90 yoshi bilan tabriklagani, 11-mart kuni Putinning Turkiya prezidenti Rajab Toyyib Erdo‘g‘on videokonferensaloqa rejimida Turkiyadagi “Akkuyu” atom elektr stansiyasining (AES) uchinchi energiya bloki qurilishiga start bergani, shuningdek, Rossiya prezidentining hukumatga bir oy ichida Arktikani rivojlantirish rejasini tayyorlashni yakunlash va qabul qilish to‘g‘risida ko‘rsatma bergani xususida xabar qilingan.
Izoh (0)