O‘zbekiston Prezidenti Shavkat Mirziyoyev va Qozog‘iston prezidenti Qosim-Jo‘mart To‘qayev o‘zaro telefon orqali suhbatlashdi. Bu haqda Qozog‘iston prezidenti matbuot xizmati xabar qildi.
Ta’kidlanishicha, davlat rahbarlari Markaziy Osiyodagi vaziyat yuzasidan fikr almashdi. Ushbu strategik muhim mintaqaning xavfsizligi, barqarorligi va farovonligini ta’minlash maqsadida keng ko‘lamli, samarali hamkorlikka o‘zaro intilishlarini tasdiqladilar.
Ikki davlat hukumatlari o‘zaro savdo-iqtisodiy va gumanitar hamkorlikning asosiy masalalarini hal qilish bo‘yicha muvofiqlashtirilgan ishlarni davom ettirishi ta’kidlandi.
Shuningdek, Qosim-Jo‘mart To‘qayev Olmaota yaqinidagi aviahalokat qurbonlariga ta’ziya bildirgani uchun O‘zbekiston rahbariga minnatdorlik bildirdi.
Prezidentlar yaqinlashib kelayotgan Navro‘z bayrami bilan bir-birlarini tabriklab, Qozog‘iston va O‘zbekiston xalqlariga farovonlik tilashdi.
Eslatib o‘tamiz, Qozog‘istonning Olmaota shahri aeroporti yaqinida An-26 samolyoti qulab tushgani haqida xabar berilgandi. Hodisa oqibatida to‘rt kishi halok bo‘lgan, ikki kishi jarohatlanib, shifoxonaga yuborilgan.
Bundan avval Shavkat Mirziyoyevni AQSh prezidenti Jozef Bayden Navro‘z bayrami bilan tabriklagandi.
Izoh (0)