Ўзбекистон Президенти Шавкат Мирзиёев ва Қозоғистон президенти Қосим-Жўмарт Тўқаев ўзаро телефон орқали суҳбатлашди. Бу ҳақда Қозоғистон президенти матбуот хизмати хабар қилди.
Таъкидланишича, давлат раҳбарлари Марказий Осиёдаги вазият юзасидан фикр алмашди. Ушбу стратегик муҳим минтақанинг хавфсизлиги, барқарорлиги ва фаровонлигини таъминлаш мақсадида кенг кўламли, самарали ҳамкорликка ўзаро интилишларини тасдиқладилар.
Икки давлат ҳукуматлари ўзаро савдо-иқтисодий ва гуманитар ҳамкорликнинг асосий масалаларини ҳал қилиш бўйича мувофиқлаштирилган ишларни давом эттириши таъкидланди.
Шунингдек, Қосим-Жўмарт Тўқаев Олмаота яқинидаги авиаҳалокат қурбонларига таъзия билдиргани учун Ўзбекистон раҳбарига миннатдорлик билдирди.
Президентлар яқинлашиб келаётган Наврўз байрами билан бир-бирларини табриклаб, Қозоғистон ва Ўзбекистон халқларига фаровонлик тилашди.
Эслатиб ўтамиз, Қозоғистоннинг Олмаота шаҳри аэропорти яқинида Ан-26 самолёти қулаб тушгани ҳақида хабар берилганди. Ҳодиса оқибатида тўрт киши ҳалок бўлган, икки киши жароҳатланиб, шифохонага юборилган.
Бундан аввал Шавкат Мирзиёевни АҚШ президенти Жозеф Байден Наврўз байрами билан табриклаганди.
Изоҳ (0)