Surxondaryo viloyati Bandixon tumanida Cobalt va Damas ishtirokida sodir bo‘lgan to‘qnashuv oqibatida ikki kishi halok bo‘ldi. Bu haqda IIV YHXBB axborot xizmati xabar berdi.
Ma’lum qilinishicha, ko‘ngilsiz hodisa Bandixon tumani “Obikor” mahallasi hududidan o‘tuvchi 4R-105 avtomobil yo‘lining 63-kilometrida sodir bo‘lgan.
1993-yilda tug‘ilgan Cobalt haydovchisi Toshkent—Denov yo‘nalishida harakatlanayotib, yo‘lning xavfli burilish qismida o‘zidan oldinda harakatlanayotgan mashinani quvib o‘tishga uringan. Shu vaqtda qarama-qarshi yo‘nalishda harakatlanib kelayotgan, 1995-yilda tug‘ilgan haydovchi boshqaruvidagi Damas bilan to‘qnashib ketgan.
Oqibatda 2 nafar fuqaro vafot etib, bir nafari shifoxonaga yotqizilgan.
Shuningdek, 10-mart kuni Samarqand viloyati Toyloq tumanidan o‘tuvchi A-377 avtomobil yo‘lida Cobalt va yuk mashinasi ishtirokida sodir bo‘lgan yo‘l-transport hodisasi sodir bo‘lgan.
Ma’lumotlarga ko‘ra, 1994-yilda tug‘ilgan fuqaro mast holda Cobalt’ni boshqarib ketayotib, yuk mashinasining orqasiga kelib urilgan. YTH oqibatida haydovchi va old o‘rindiqda bo‘lgan yo‘lovchi halok bo‘lgan, yana ikki nafar yo‘lovchi shifoxonaga yotqizilgan.
Bundan tashqari, 10-mart kuni soat 05:40 larda Namangan viloyati Yangiqo‘rg‘on tumanidagi “Madaniyat” MFY hududida haydovchilik guvohnomasiga ega bo‘lmagan 2000-yilda tug‘ilgan yigit “VAZ-2101” transport vositasini boshqarayotib, piyodani urib yuborgan. Jabrlanuvchi olgan tan jarohatlari sabab shifoxonada vafot etgan.
Avvalroq Surxondaryoda Nexia-2 yo‘lni kesib o‘tayotgan 1-sinf o‘quvchisini urib yuborgani, Farg‘onada Lacetti bilan to‘qnashgan Matiz yonib ketishi oqibatida ikki nafar yo‘lovchi ayol vafot etgani, Farg‘onada MAN va Nexia ishtirokida sodir bo‘lgan YTH oqibatida ikki kishi halok bo‘lgani to‘g‘risida xabar berilgandi.
Izoh (0)