10-mart kuni Senatning o‘n uchinchi yalpi majlisi oldidan “Xotin-qizlar va gender tenglik masalalari qo‘mitasi” yig‘ilishi o‘tkazildi. UzNews’ning ma’lum qilishicha, unda qizlarni erta turmushga berish va qarindosh-urug‘ o‘rtasidagi nikohning oldini olish bo‘yicha amalga oshirilayotgan ishlar hisoboti tinglandi.
“Mahalla va oila” ilmiy-tadqiqot institutining direktori Nodira Egamberdiyevaning ma’lum qilishicha, O‘zbekistonda “oilaning baxtlilik indikatori” ishlab chiqilmoqda. Shu maqsadda “Baxtiyor oila” veb-sayti yaratilmoqda. Sayt baxtiyor oila qanday bo‘lishi, nima qilish kerakligiga qaratilgan. Foydalanuvchilarga oilalarda ayrim mavjud maishiy kamchiliklarni hal qilish yo‘llari ham ko‘rsatilishi rejalashtirilgan.
Bundan tashqari, Nodira Egamberdiyeva institut tomonidan erta nikohga undovchi omillar sabablari o‘rganilayotganini ta’kidlab, tegishli qaror asosida tez orada “Bibixonim” maktablari tuzilishini ma’lum qildi.
“Buning konseptual asoslarini ishlab chiqyapmiz. Bu maktablarda asosan 5-6 yo‘nalishda, o‘smir yoshdagi qizlarni hayotga tayyorlash, ularda yetakchilik sifatlarini shakllantirish, turli yechim va qarorlar qabul qilish borasida qizlar o‘qitiladi”, — degan Nodira Egamberdiyeva.
Eslatib o‘tamiz, Vazirlar Mahkamasi huzuridagi “Oila” ilmiy-amaliy tadqiqot markazi, Xotin-qizlar qo‘mitasi va O‘zbekiston Yoshlar ittifoqi Yoshlarni oilaviy hayotga tayyorlash markazlarini tashkil etishni taklif qilgandi. Bu haqdagi hukumatning tegishli qarori loyihasi 2019-yilning noyabr oyi va 2020-yilning iyunida muhokama uchun e’lon qilingandi.
Senator Dilorom Toshmuhamedova Toshkent viloyatida so‘nggi ikki yilda voyaga yetmagan qizlarning homilador bo‘lib qolishi ikki barobarga ko‘payganini aytgandi. Shuhrat G‘aniyev ba’zi otalar qizlarini turmushga berishda shoshma-shosharlikka yo‘l qo‘yishi oilalar ajrimiga ta’sir qilishini bildirgan.
Ma’lumot uchun, O‘zbekistonda 2019-yilning 1-sentabridan nikoh yoshi erkaklar va ayollar uchun 18 yosh etib belgilangan (ilgari ayollar uchun 17 yosh bo‘lgan).
Izoh (0)