Mahallalarda “Ayollar maslahat kengashi” faoliyati yo‘lga qo‘yiladi. Bu haqda O‘zbekiston Vazirlar Mahkamasining 30-yanvar kuni jamoatchilik muhokamasi uchun e’lon qilgan tegishli qarori loyihasida qayd etildi.
Unda aytilishicha, kengashning asosiy maqsadi — ijtimoiy himoyaga muhtoj xotin-qizlarning muammolarini o‘rganish va hal etishga ko‘maklashish, oilalarni mustahkamlash va farzand tarbiyasidagi rolini hamda ijtimoiy faolligini oshirishga qaratilgan maslahatlar berish, odobli qiz, iffatli kelin va ma’rifatli ayol g‘oyalarini keng targ‘ib etish.
Kengash, shuningdek, quyidagi vazifalarni amalga oshiradi:
- xotin-qizlarni ijtimoiy qo‘llab-quvvatlashga muhtojlik darajasini manzilli o‘rganish orqali muammmolarni mutasaddilarga taqdim etish;
- xotin-qizlarga huquqiy, ma’naviy-axloqiy, pedagogik, psixologik va tibbiy maslahatlar berish orqali ularning oilalarni mustahkamlash va farzand tarbiyasidagi rolini oshirish;
- qizlarni umuminsoniy va milliy qadriyatlar, odob-axloq qoidalari asosida tarbiyalash, kiyinish madaniyatiga rioya qilish masalalarini keng targ‘ib qilish;
- xotin-qizlarni manzilli (huquqiy, ma’naviy-axloqiy, pedagogik, psixologik va tibbiy bilimlarini oshirish bo‘yicha) o‘quvlarga jalb etish;
- xotin-qizlarning bilim olish huquqlarini himoya qilish, ularning shaxsiy va kasbiy o‘sishi, ijodiy va intellektual qobiliyatlarini namoyon qilishiga ko‘maklashish;
- xotin-qizlarning kasb-hunarga o‘qish xohishini hisobga olgan holda mehnat bozorida talab yuqori bo‘lgan kasblar bo‘yicha bilim va ko‘nikmalar egallashiga hamda ishga joylashishiga, tadbirkorlikni yo‘lga qo‘yishi va rivojlantirishi uchun kredit olishiga ko‘maklashish orqali ijtimoiy faolligini oshirish;
- xotin-qizlarga milliy urf-odat, an’ana va marosimlarni tashkil etish hamda o‘tkazishda yo‘l-yo‘riq ko‘rsatish.
Ushbu qaror loyihasi muhokamasi 14-fevralgacha davom etadi.
Eslatib o‘tamiz, Shavkat Mirziyoyev 29-dekabr kuni Oliy Majlisga yo‘llagan Murojaatnomasida islohotlarning ustuvor yo‘nalishlaridan biri ayollarning davlat va jamoat boshqaruvidagi rolini yanada oshirish ekanini aytib o‘tgandi. “Mamlakatda yashovchi 17 milliondan ziyod ayollar — qizlarimiz, onalarimiz va buvilarimiz uchun munosib turmush sharoitlarini yaratish uchun qo‘limizdan kelgan barcha ishni amalga oshirishimiz lozim”, — degan edi Prezident.
Davlat rahbari “hayotni va ayollar muammolarini yaxshi biladigan, faol va tashabbuskor ayollardan iborat” Respublika xotin-qizlar jamoatchilik kengashini tashkil etishni va unga Senat raisi Tanzila Norboyevaga rahbarlik qilishni taklif qilgandi.
Murojaatnomada, shuningdek, ayollarning biznes loyihalarini qo‘llab-quvvatlash hamda joylarda aniqlangan xotin-qizlar muammolarini hal qilish uchun budjetdan qo‘shimcha ravishda 1 trillion so‘mdan ortiq mablag‘ ajratilishi aytilgan.