Oxirgi ikki yilda Toshkent viloyatida voyaga yetmagan qizlarning homilador bo‘lish holatlari ikki barobarga ko‘paygan. Bu haqda Oliy Majlis Senatning Yoshlar, madaniyat va sport masalalari qo‘mitasi raisi o‘rinbosari Dilorom Toshmuhamedova Xalq ta’limi vazirligida bo‘lib o‘tgan matbuot anjumanida ma’lum qildi.

Dilorom Toshmuhamedova

Foto: O‘zbekiston Respublikasi Oliy Majlis Senati

“Yoshlarimizning, ayniqsa, o‘spirinlarimizning o‘zining salomatligi to‘g‘risida bilimi yetarli emasligi muayyan muammolarni keltirib chiqarmoqda. Buning natijasida bir nechta salbiy holatlar uchramoqda. Misol uchun, Toshkent viloyatida erta tug‘ish ko‘rsatkichi o‘sib borayotganligi, ba’zi bir viloyatlarda o‘smir qizlar orasida abortning ko‘payayotgani juda ayanchli holat”, – dedi Dilorom Toshmuhamedova.

Senatorning aytishicha, birgina Samarqand viloyatida voyaga yetmagan qizlar o‘rtasida sun’iy abort qildirish soni 72 tagacha ko‘tarilgan. Toshkent viloyatida esa 2019-yilda 15-16 yosh oralig‘idagi qizlarda erta tug‘ish holati ikki barobarga ko‘paygan.

Shuningdek, respublika bo‘yicha onalar va bolalar o‘limi ko‘rsatkichi kamayayotgan bo‘lsa-da, Qoraqalpog‘iston Respublikasi va Jizzax viloyatining ayrim tumanlarda bu ko‘rsatkich oshib bormoqda. Bularning aksariyati erta turmush qurgan qizlarning homiladorlik va bola parvarishi bo‘yicha bilimi yetarli darajada emasligi aniqlangan.

“Yoshlarimizning rivojlanishida ikkita asosiy yo‘nalishga: ta’lim tarbiya va ularning sog‘lig‘i, salomatligiga ko‘proq e’tibor berishimiz kerak. Ertangi kunimiz – genofondimizning kelajagi haqida o‘ylar ekanmiz, hozirgi yigit-qizlarimizning sog‘lig‘i to‘g‘risida qayg‘urishimiz kerak. Ularga maktab davridayoq sog‘liqni asrash bo‘yicha kerakli bilim va maslahatlar berishimiz lozim”, – dedi senator.

Ta’kidlanishicha, shunday salbiy holatlarning oldini olish bo‘yicha Xalq ta’limi vazirligi va boshqa jamoat tashkilotlari bilan hamkorlikda o‘quv dasturlari ishlab chiqilmoqda va keyingi o‘quv yillaridan bosqichma-bosqich joriy qilinadi.