Prezident farmoni bilan O‘zbekiston fuqaroligi masalalarini ko‘rib chiqish tartibi to‘g‘risidagi nizom tasdiqlandi. Bu haqda Adliya vazirligi xabar qildi.
Nizomga ko‘ra, O‘zbekiston fuqaroligi masalalari yuzasidan iltimosnoma va arizalar:
- O‘zbekiston hududida yashab turgan shaxs tomonidan – doimiy yashash joyidagi ichki ishlar organiga;
- O‘zbekistondan tashqarida yashovchi shaxs tomonidan – O‘zbekistonning konsullik muassasasi, shuningdek, O‘zbekiston diplomatik vakolatxonasining konsullik bo‘limiga topshiriladi.
18 yoshga to‘lgan va muomala layoqatiga ega bo‘lgan, O‘zbekistonda doimiy yashovchi chet el fuqarosi yoki fuqaroligi bo‘lmagan shaxs O‘zbekiston fuqaroligiga umumiy tartibda qabul qilish bo‘yicha iltimosnoma bilan murojaat qilishi mumkin. Iltimosnoma 3 ish kunida o‘rganib chiqiladi.
Ma’lumotlar 3 ish kunida “E-Fuqaro” idoralararo ma’lumotlar bazasiga kiritilib, materiallar Qoraqalpog‘iston Ichki ishlar vazirligi, Toshkent shahar va Toshkent viloyati ichki ishlar bosh boshqarmalari, viloyat ichki ishlar boshqarmalariga yuboriladi.
“E-Fuqaro” IMBda tekshiruvdan o‘tib, yakunlangan talabnomaga muvofiq tekshiruv varaqasi chop etiladi.
Materiallar va tekshiruv varaqasi asosida 1 oylik muddatda xulosa tayyorlanib, ichki ishlar vaziri yoki uning o‘rinbosarlaridan biri tomonidan tasdiqlanadi hamda umumlashtirilgan axborot-ma’lumotnoma bilan birga ko‘rib chiqish uchun Prezident huzuridagi Fuqarolik masalalari bo‘yicha komissiyaga yuboriladi.
Nizom bilan, shuningdek, O‘zbekiston fuqaroligiga qabul qilish tartiblari soddalashtirilishi belgilandi.
Bundan avval O‘zbekistonda 16 mingdan ortiq fuqaroga ID-karta rasmiylashtirib berilgani hamda O‘zbekistonda fuqarolik jamiyatini rivojlantirish konsepsiyasi tasdiqlangani haqida xabar berilgandi.
Izoh (0)