AQSh Kongressi Amerika iqtisodiyotini qo‘llab-quvvatlash uchun 1,9 trillion dollarlik rejani ma’qulladi, unga ko‘ra, aksariyat amerikaliklarga 1400 dollar miqdorida to‘g‘ridan to‘g‘ri to‘lovlar amalga oshiriladi. Bu haqda Meduza xabar berdi.
AQSh Vakillar palatasi oldinroq ma’qullangan qonunga Senat tomonidan kiritilgan o‘zgartirishlarni tasdiqlash uchun 10-mart kuni yana to‘plandi (senatorlar hujjatni 7-mart kuni ma’qullagandi).
Vakillar palatasining 220 nafar a’zosi ushbu qonunni qabul qilish uchun ovoz berdi, 211 nafari bunga qarshi chiqdi. AQSh prezidenti Jo Bayden hujjatni 12-mart kuni imzolashga va’da berdi.
Iqtisodiy qo‘llab-quvvatlash rejasi, boshqa masalalar qatorida, 400 milliard dollar ajratishni nazarda tutadi, bu mablag‘ Amerikaning aksariyat aholisiga yo‘naltiriladi. Bundan tashqari, rejaga ko‘ra, haftasiga 300 dollar miqdoridagi ishsizlik nafaqasini to‘lab berish sentabr oyining boshiga qadar uzaytiriladi.
2020-yilning dekabr oyida AQSh Kongressi qariyb 900 milliard dollarlik iqtisodiy yordam paketi doirasida ko‘plab amerikaliklarga to‘g‘ridan to‘g‘ri 600 dollardan to‘lab berishni ma’qullagan.
Xuddi shu oyda Vakillar palatasi to‘g‘ridan to‘g‘ri to‘lovlarni 2000 dollarga yetkazish uchun ovoz berdi. Ushbu tashabbus AQShning o'sha paytdagi prezidenti Donald Tramp tomonidan qo‘llab-quvvatlanganiga qaramay, respublikachilar nazorati ostida bo‘lgan senat bu taklifni rad etdi.
Yanvar oyi boshida bezorilar respublikachi senator Mitch Makkonnellning, shuningdek, Vakillar palatasi spikeri, demokrat Nensi Pelosining uyiga hujum qildi. Hujumlar Senatning to‘g‘ridan to‘g‘ri to‘lovlar miqdorini 2000 dollarga oshirishni rad etish bilan bog‘liq edi.
Izoh (0)