Qirg‘izistonda yangi konstitutsiya qabul qilish bo‘yicha referendum 11-aprel kuni o‘tkaziladi

Qirg‘iziston parlamenti deputatlari so‘nggi — uchinchi o‘qishda mamlakatning yangi konstitutsiyasini qabul qilish bo‘yicha referendumni 11-aprelda o‘tkazishni nazarda tutuvchi qonun loyihasini ma’qulladi. Bu haqda mamlakat qonun chiqaruvchi organining matbuot xizmatiga tayanib, “Interfaks” xabar berdi.

“11-mart kungi yig‘ilishda 94 nafar deputat (hozirda Qirg‘iziston parlamentida 120 nafar deputat bor) ikkinchi va uchinchi o‘qishda 11-aprel kuni yangi konstitutsiyani qabul qilish bo‘yicha referendum o‘tkazish to‘g‘risidagi qonun loyihasini ma’qulladi”, — deya xabar qildi matbuot xizmati.

Shu tarzda, referendum mahalliy saylovlar bilan bir vaqtda bo‘lib o‘tadi.

8-fevral kuni Qirg‘iziston prezidenti Sadir Japarov mahalliy kengashlar uchun deputatlar saylovini 11-aprelda o‘tkazish to‘g‘risida farmonni imzolagan edi.

17-fevraldan Qirg‘iziston parlamenti mamlakat konstitutsiyasining yangi loyihasini muhokama qila boshladi, unda mamlakatda prezidentlik boshqaruv shaklini tasdiqlash, Xalq qurultoyi institutini (Xalq assambleyasi) joriy etish, shuningdek, parlament deputatlari sonining hozirgi miqdori— 120 kishidan 90 kishiga kamaytirish masalalari ko‘zda tutilgan.

Yangi konstitutsiya loyihasida aytilishicha, bitta Qirg‘iziston prezidenti mamlakatni ko‘pi bilan ikki marta besh yil muddatga boshqarishi mumkin bo‘ladi. Qirg‘izistonning amaldagi konstitutsiyasiga binoan davlat rahbari olti yil muddatga saylanadi, lekin ikki marta saylanishi mumkin emas.

Yangi loyihaga ko‘ra, hukumat tuzilishi va tarkibi prezident tomonidan belgilanadi, bosh vazir boshchiligidagi hukumat faoliyati prezident ma’muriyati tomonidan ta’minlanadi. Hukumat rahbari, o‘z navbatida, prezident ma’muriyatiga rahbarlik qiladi.

Loyihada, shuningdek, Qirg‘iziston konstitutsiyaviy sudini tuzib, konstitutsiyaviy palatani Oliy sud tarkibidan chiqarish taklif etiladi.

Eslatib o‘tamiz, Prezident Shavkat Mirziyoyevning taklifiga binoan Qirg‘iziston prezidenti Sadir Japarov 11-mart kuni davlat tashrifi bilan O‘zbekistonga keldi. Uni bosh vazir Abdulla Aripov kutib oldi.

Sadir Japarov Qirg‘iziston prezidenti sifatidagi ilk chet el safarini 24—25-fevral kunlari Rossiyaga amalga oshirgan edi.