АҚШ Конгресси Америка иқтисодиётини қўллаб-қувватлаш учун 1,9 триллион долларлик режани маъқуллади, унга кўра, аксарият америкаликларга 1400 доллар миқдорида тўғридан-тўғри тўловлар амалга оширилади. Бу ҳақда Meduza хабар берди.
АҚШ Вакиллар палатаси олдинроқ маъқулланган қонунга Сенат томонидан киритилган ўзгартиришларни тасдиқлаш учун 10 март куни яна тўпланди (сенаторлар ҳужжатни 7 март куни маъқуллаганди).
Вакиллар палатасининг 220 нафар аъзоси ушбу қонунни қабул қилиш учун овоз берди, 211 нафари бунга қарши чиқди. АҚШ президенти Жо Байден ҳужжатни 12 март куни имзолашга ваъда берди.
Иқтисодий қўллаб-қувватлаш режаси, бошқа масалалар қаторида, 400 миллиард доллар ажратишни назарда тутади, бу маблағ Американинг аксарият аҳолисига йўналтирилади. Бундан ташқари, режага кўра, ҳафтасига 300 доллар миқдоридаги ишсизлик нафақасини тўлаб бериш сентябрь ойининг бошига қадар узайтирилади.
2020 йилнинг декабрь ойида АҚШ Конгресси қарийб 900 миллиард долларлик иқтисодий ёрдам пакети доирасида кўплаб америкаликларга тўғридан-тўғри 600 доллардан тўлаб беришни маъқуллаган.
Худди шу ойда Вакиллар палатаси тўғридан-тўғри тўловларни 2000 долларга етказиш учун овоз берди. Ушбу ташаббус АҚШнинг ўша пайтдаги президенти Дональд Трамп томонидан қўллаб-қувватланганига қарамай, республикачилар назорати остида бўлган сенат бу таклифни рад этди.
Январь ойи бошида безорилар республикачи сенатор Митч Макконнеллнинг, шунингдек, Вакиллар палатаси спикери, демократ Нэнси Пелосининг уйига ҳужум қилди. Ҳужумлар Сенатнинг тўғридан-тўғри тўловлар миқдорини 2000 долларга оширишни рад этиш билан боғлиқ эди.
Изоҳ (0)