Dunyoda o‘tgan bir kecha-kunduzda yuz bergan koronavirus bilan bog‘liq eng muhim yangiliklar bilan “Daryo” koronadayjestida tanishing.
Qaysi mamlakatlar lokdaun e’lon qildi?
Estoniyada 11-martdan hukumat tomonidan joriy qilingan qat’iy cheklovlar kuchga kirdi, ular koronavirus infeksiyasining “britancha” shtammi tarqalishining oldini olishga qaratilgan. Lokdaun bir oy muddatga — 11-aprelgacha kiritilmoqda. Uning doirasida o‘quv muassasalari masofaviy rejimga o‘tkaziladi, ota-onalarga kuchli zarurat bo‘lmasa, bolalarini bog‘chalarga olib borish tavsiya etilmaydi. Fuqarolar ko‘chada kamida ikki metrlik masofani saqlagan holda, ko‘pi bilan ikki kishi bo‘lib yurishi mumkin. Eng zarur mahsulotlar sotiladigan do‘konlardan boshqalari yopiladi. Umumiy ovqatlanish muassasalari, sport zallari, basseynlar va ko‘ngilochar muassasalar ham yopiladi.Shuningdek, Sharqiy Afrikadagi orol davlat — Mavrikiyda ham COVID-19’ga chalinish holatlari ko‘paygani tufayli lokdaun e’lon qilindi va 25-martga qadar xalqaro reyslarni qabul qilish taqiqlandi. Lokdaunga mamlakatning turli nuqtalarida koronavirus bilan kasallangan to‘rt kishining aniqlanishi sabab bo‘lgan. 9-martga kelib, bemorlar soni 15 kishiga yetgan. 10-martdan 25-martga qadar faqat asosiy xizmatlar, shu jumladan, port, aeroport, kasalxona va shoshilinch yordam xizmatlari ishlaydi. Supermarket, novvoyxona, dorixona va AYoQShlar cheklangan rejimda faoliyat yuritadi. Mavrikiy — dam olish uchun qimmatbaho yo‘nalish bo‘lib, u yerga asosan badavlat sayyohlar tashrif buyuradi. 2021-yil yanvari oxirida mamlakat hukumati emlangan sayyohlar ikki haftalik karantinsiz kiritilishini e’lon qilgan edi.
“Britancha” shtamm 64 foizga ko‘proq o‘lim keltirishi aniqlandi
Ko‘plab mamlakatlarda lokdaun kiritilishiga sababchi bo‘layotgan “britancha” shtamm koronavirusning avvalgi shtammlariga nisbatan 64 foizga ko‘proq o‘limga olib kelishi aniqlandi. Ekseter universiteti tadqiqotchilari oktabr va yanvar oralig‘ida koronavirus aniqlangan taxminan 55 ming juft ishtirokchilarning ma’lumotlarini taqqoslab chiqdi va ularni 28 kun davomida kuzatdi. Koronavirusning yangi variant bilan kasallanganlar uchun holatning o‘lim bilan tugashi ehtimoli 64 foizga yuqoriroq bo‘lib chiqdi. Xususan, o‘lim darajasi har 1000 ta holatga 2,5 dan 4,1 gacha oshdi.Turizmni qayta tiklash uchun amalga oshirilayotgan choralar
Ispaniya hukumati COVID-pasportlar — koronavirusga qarshi emlanganlar uchun elektron hujjatlar tizimini iloji boricha tezroq joriy qilish ustida ishlamoqda. Mamlakat sanoat, savdo va turizm vaziri Mariya Reyes Marotoning aytishicha, bu bahor oxirlarida yuz berishi mumkin. 19-may kuni Madridda Fitur sayyohlik yarmarkasi bo‘lib o‘tishi kerak, u “turizmning qayta tug‘ilishi”ga aylanishi kutilmoqda. Ushbu sanagacha hukumat emlanganlar uchun raqamli sertifikat qo‘llashni boshlashni rejalashtirmoqda.Tailandda esa sayyohlarga ikki haftalik karantinni Pxuketda yaxtada yoki kichik kruiz laynerida o‘tash uchun ruxsat berildi. Faqat COVID-19 testi manfiy bo‘lgan sayyohlargina bunday imkoniyatga ega bo‘ladi. Bundan tashqari, ular tana harorati, qon bosimini nazorat qiluvchi va GPS yordamida ular joylashgan joyni ko‘rsatib turuvchi “aqlli” bilaguzuk taqib yurishi kerak. Hukumat ushbu tashabbus mamlakat budjetiga 58 million dollar keltirishiga umid qilmoqda.
Vaksinalar va emlash bilan bog‘liq vaziyat
Isroilda o‘smirlarni emlash boshlandi. 12 dan 16 yoshgacha bo‘lgan 600 ga yaqin isroillik bolalar koronavirusga qarshi Pfizer/BioNTech vaksinasi bilan emlandi. Ularda jiddiy ikkilamchi ta’sirlar aniqlanmagan.Rossiya esa bolalarni ommaviy immunizatsiya qilmoqchi emas. “Rospotrebnadzor” rahbari Anna Popova Rossiyada bolalarni koronavirusga qarshi ommaviy emlash uchun zarurat yo‘qligini aytdi. Uning so‘zlariga ko‘ra, bolalar koronavirusni yengil kechiradi va ularda immunitet, hatto, simptomlar bo‘lmasa ham, tezkorlik bilan ishlab chiqariladi.
Ayni paytda Isroil vaksinatsiya bo‘yicha yetakchi davlatlardan biri bo‘lib turibdi. U yerda COVID-19’ga qarshi vaksinaning birinchi dozasi bilan aholining 57 foizi emlangan. Ushbu ko‘rsatkich bo‘yicha Isroil dunyoda ikkinchi o‘rinda. Birinchi o‘rinda — Seyshel orollari: u yerda 58 foiz aholi COVID-preparatning birinchi qismini olgan. Uchinchi o‘rinda esa Buyuk Britaniya joylashdi, mamlakat aholisining 32 foizi vaksinaning birinchi dozasini qabul qilgan.
Vaksinaning kamida bitta dozasini olgan aholi ulushi bo‘yicha yuqori o‘nlikka Chili, Bahrayn, AQSh, Barbados, Serbiya, Malta va Marokash ham kiradi.
AQSh prezidenti Jo Bayden may oxirigacha mamlakatdagi voyaga yetgan aholi — 260 million kishi uchun yetarli bo‘ladigan miqdorda vaksina sotib olishga va’da berdi. Iyul oxirigacha 300 million dozada Modern ava Pfizer/BioNTech vaksinalari yetkazib beriladi. Bundan tashqari, Bayden Johnson&Johnson kompaniyasidan 100 million doza vaksina sotib olishni buyurdi. U koronavirus bilan bog‘liq vaziyatda ko‘p narsa o‘zgarishi mumkinligini aytib, AQSh vaksinalarni zaxira qilishi va ehtimoliy o‘zgarishlarga tayyor turishi kerakligini ta’kidladi.
Shuningdek, agar aholini emlash kampaniyasi chog‘ida ortiqcha vaksinalar paydo bo‘lsa, ularni boshqa mamlakatlar bilan bo‘lishishga tayyorligini bildirdi. “Avval amerikaliklar haqida qayg‘uramiz, so‘ng qolgan dunyoga yordam berishga harakat qilamiz”, — dedi Bayden.
Rossiyaning koronavirusga qarshi vaksinasi Iordaniyada, Marokkoda, Keniyada va Zimbabveda ham foydalanish uchun ma’qullandi. Shu tariqa, “Sputnik V” ro‘yxatdan o‘tkazilgan davlatlar soni 49 taga yetdi.
Izoh (0)