Rossiya prezidenti Vladimir Putin va Turkiya prezidenti Rajab Toyyib Erdo‘g‘on videokonferensaloqa rejimida Turkiyadagi “Akkuyu” atom elektr stansiyasining (AES) uchinchi energiya bloki qurilishiga start berdi, deb yozadi “RBK”.
“Rossiya va Turkiya mutaxassislari — atomshunos olimlar, muhandislar, ishchilarning muvofiqlashtirilgan sa’y-harakatlari atom elektr stansiyasi qurilishini kelishilgan jadval bo‘yicha ta’minlashga imkon berayotganidan mamnunligimni bildirmoqchiman”, — dedi Putin.
Rossiya prezidenti, shuningdek, koronavirus pandemiyasi ham loyihani amalga oshirishga xalaqit bera olmaganini ta’kidladi.
Turkiya prezidenti, o‘z navbatida, stansiyaning so‘nggi blokini qurish 2022-yilga rejalashtirilganini ma’lum qildi.Ma’lumot uchun, “Akkuyu” — O‘rta Yer dengizi sohilidagi Mersin viloyatida joylashgan VVER-1200 reaktorlardan iborat to‘rt blokli atom elektr stansiyasi. Atom elektr stansiyasini qurish to‘g‘risidagi bitim 2010-yil may oyida imzolangan, ammo qurilish ishlari 2018- yilga kelibgina boshlangan.
O‘shanda Erdo‘g‘on birinchi energiya blokini yotqizish jarayonini “tarixiy lahza” deb atagan va AES to‘liq quvvatga yetgan taqdirda, Turkiyaning elektr energiyaga bo‘lgan ehtiyoji 10 foiz qoplanishi hamda mamlakatning gaz va ko‘mirga qaramligi kamayishini ta’kidlagan.
Izoh (0)