Jahon sog‘liqni saqlash tashkiloti (JSST) butun dunyoda koronavirusga qarshi vaksinaga nisbatan ishonchsizlikni qayd etdi. JSST mutaxassislari emlash kampaniyasining muvaffaqiyatsizlikka uchrashidan qo‘rqadi, chunki bu boshqa vaksinatsiya dasturlariga salbiy ta’sir qiladi. Bu haqda JSSTning Rossiyadagi vakili Melita Vuynovich aytib o‘tdi, deb yozadi “Korrespondent.net”.
“Hozir dunyodagi barcha mamlakatlarda yuz berayotgan ishonch inqiroziga guvoh bo‘lyapmiz. Bu aholi va davlat o‘rtasidagi ishonch inqirozidir. Biz juda xavotirdamiz, chunki agar dunyo bo‘ylab koronavirusga qarshi emlash ishlari muvaffaqiyatsiz tugasa, bu boshqa barcha immunizatsiya dasturlariga halokatli ta’sir qiladi. Shunday qilib, biz eng muhim chora — yuqumli kasalliklarga qarshi kurashishga imkon beradigan chorani qo‘ldan boy beryapmiz ”, — dedi Vuynovich Yangi avlodni himoyalash V milliy assambleyasi doirasida o‘tkazilgan onlayn yig‘ilishda.
U ishonchga ta’sir qiladigan to‘rtta omil haqida gapirdi.
Mutaxassisning so‘zlariga ko‘ra, avvalo, bu bevosita aholi bilan bog‘liq. Ikkinchi muhim omil bu ma’lumot manbai bo‘lib, u orqali fuqarolarning fikri shakllanadi. Uchinchisi — atrof-muhit, va nihoyat, oxirgisi hukumat va shifokorlarning namuna bo‘lishidir.
Vuynovich agar aholi siyosatchi va shifokorlarning qanday emlanayotganini ko‘rsa, vaksinatsiyaga katta ishonch bildirishini alohida ta’kidladi.
Eslatib o‘tamiz, amerikaliklarning 40 foizidan ko‘prog‘i koronavirusga qarshi emlanishni istamasligini ma’lum qilgan. Vaksina olishni istamayotganlarning 66 foizi koronavirusga qarshi preparatning nojo‘ya ta’siridan xavotirda bo‘lsa, qolgan 33 foizi vaksinani samarasiz deb hisoblaydi.
Avvalroq Gretsiya COVID-19’ga qarshi emlanganlarda jiddiy asoratlar kuzatilgani va 85 yoshli erkak COVID-19’ga qarshi emlanganidan keyin vafot etgani haqida xabar berilgandi.
Izoh (0)