Qoraqalpog‘istonda budjet mablag‘larini talon-toroj qilgan bolalar-o‘smirlar sport maktabi mas’ullariga nisbatan jinoyat ishi qo‘zg‘atildi, deb xabar beradi Bosh prokuratura huzuridagi departament matbuot xizmati.
Ma’lum qilinishicha, departamentning Ellikqal’a tuman bo‘limi tomonidan tergovga qadar tekshiruv o‘tkazilgan. Tekshiruv davomida tumandagi bolalar-o‘smirlar sport maktabi mas’ul va moddiy javobgar shaxslari 2018—2020-yillarda maktabning murabbiy va xodimlariga jami 491,4 million so‘m xizmat safari xarajatlari hamda ish haqlarini naqd pul shaklida ajratib, to‘lov qaydnomalardagi imzolarni soxtalashtirib kelgani aniqlangan.
Mazkur holat yuzasidan Jinoyat kodeksining 167-moddasi (talon-toroj qilish) va 209-moddasi (mansab soxtakorligi) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Zangiotada “Yoshlar — kelajagimiz” jamg‘armasi rahbarlari katta summadagi kredit mablag‘larini talon-toroj qilingani, Marg‘ilonda 1,4 milliard so‘m miqdorida soliq to‘lovlarini to‘lamagan korxona rahbariga jinoyat ishi ochilgani hamda Namanganda 25 nafar fuqaroga ajratilgan 669,4 million so‘mni tadbirkor va bank xodimlari talon-toroj qilgani aniqlangani haqida xabar berilgandi.
Izoh (0)