Namangan viloyati To‘raqo‘rg‘on tumanida “Har bir oila tadbirkor” dasturi doirasida ajratilgan mablag‘lar talon-toroj qilingani aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Bosh prokuratura huzuridagi departamentning To‘raqo‘rg‘on tuman bo‘limi tomonidan o‘tkazilgan tergovga qadar tekshiruvda “K.D.” nomli MChJ rahbari M.U. “Har bir oila tadbirkor” dasturi doirasida AT “Xalq banki” To‘raqo‘rg‘on filialidan turli fuqarolar nomiga tikuvchilik dastgohlari sotib olish uchun jami 155,2 million so‘m kredit mablag‘larini ajratgani ma’lum bo‘lgan.
M.U. ushbu kredit mablag‘larini qalbaki hujjatlarni rasmiylashtirish orqali o‘zlashtirish yo‘li bilan talon-toroj qilgan.
Mazkur holat yuzasidan jamiyat rahbari M.U.ga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Piskentda 1,3 mlrd so‘mlik imtiyozli kreditni talon-toroj qilgan fermer xo‘jaligi rahbariga jinoyat ishi qo‘zg‘atilgani to‘g‘risida xabar berilgandi.
Izoh (0)