Energetika vazirligi O‘zbekistondagi gaz-zapravkalar yana 24 soatlik ish rejimiga o‘tgani to‘g‘risida tarqalgan xabarlarga munosabat bildirdi, deb yozadi “Xalq so‘zi online”.
Ijtimoiy tarmoqlarda “3-martdan boshlab gaz zapravkalar 24 soatlik ish rejimiga o‘tdi”, degan xabarlar tarqaldi. Energetika vazirligi matbuot kotibi gaz zapravkalar faoliyatiga qo‘yilgan cheklov ob-havoga bog‘liqligini ma’lum qildi.
“Zapravkalar ishlashi to‘liq 24 soatlik rejimga o‘tildi, deb aytolmaymiz. Bu ob-havo bilan bog‘liq bo‘lgan holat. Havo harorati yaxshi bo‘lgan hududlarda mahalliy hokimiyat va gaz ta’minoti korxonalari kelishgan holda zapravkalarni odatdagi ish tartibiga o‘tkazishlari mumkin. Agar yana havo harorati pasayib, aholi va ijtimoiy soha obyektlarida gaz yetishmovchilik kuzatilsa, yana cheklovlar kiritilishi mumkin”, — dedi Elmira Bekmurodova.
Eslatib o‘tamiz, Toshkent shahridagi avtomobillarga gaz to‘ldirish shoxobchalarining gaz uzatish grafigiga 7-dekabrdan boshlab vaqtinchalik cheklov o‘rnatilgan, shuningdek, yanvar boshida O‘zbekistondagi barcha gaz zapravkalar soat 15:00 dan 05:00 gacha yopilishni boshlagan edi. 18-yanvardan O‘zbekistondagi gaz zapravkalar sutkasiga yana 24 soatdan ishlay boshlagan, biroq yanvar oxirlarida ob-havoning keskin sovishi oqibatida yana cheklov o‘rnatilgan edi.
Izoh (0)