Қорақалпоғистонда бюджет маблағларини талон-торож қилган болалар-ўсмирлар спорт мактаби масъулларига нисбатан жиноят иши қўзғатилди, деб хабар беради Бош прокуратура ҳузуридаги департамент матбуот хизмати.
Маълум қилинишича, департаментнинг Элликқалъа туман бўлими томонидан терговга қадар текширув ўтказилган. Текширув давомида тумандаги болалар-ўсмирлар спорт мактаби масъул ва моддий жавобгар шахслари 2018—2020 йилларда мактабнинг мураббий ва ходимларига жами 491,4 миллион сўм хизмат сафари харажатлари ҳамда иш ҳақларини нақд пул шаклида ажратиб, тўлов қайдномалардаги имзоларни сохталаштириб келгани аниқланган.
Мазкур ҳолат юзасидан Жиноят кодексининг 167-моддаси (талон-торож қилиш) ва 209-моддаси (мансаб сохтакорлиги) билан жиноят иши қўзғатилиб, тергов ҳаракатлари ўтказилмоқда.
Аввалроқ Зангиотада «Ёшлар — келажагимиз» жамғармаси раҳбарлари катта суммадаги кредит маблағларини талон-торож қилингани, Марғилонда 1,4 миллиард сўм миқдорида солиқ тўловларини тўламаган корхона раҳбарига жиноят иши очилгани ҳамда Наманганда 25 нафар фуқарога ажратилган 669,4 миллион сўмни тадбиркор ва банк ходимлари талон-торож қилгани аниқлангани ҳақида хабар берилганди.
Изоҳ (0)