Ukraina prezidenti Vladimir Zelenskiy koronavirus infeksiyasiga qarshi emlandi. Bu haqda u Twitter’da ma’lum qildi, deb yozmoqda “RBK”.
Zelenskiyni emlash uchun Hindistondagi zavodda AstraZeneca tomonidan ishlab chiqarilgan Covishield vaksinasidan foydalanildi. Prezidentning so‘zlariga ko‘ra, u vaksinani “askarlar bilan old qatorda turadigan bosh qo‘mondon singari birinchilardan bo‘lib” qabul qildi.
https://www.instagram.com/p/CL6efNOFZgN/?utm_source=ig_embed
“Zelenskiy Severodonetskdagi harbiy gospitalda oliy bosh qo‘mondon sifatida koronavirusga qarshi emlandi”, – deya axborot bergan Ukraina prezidentining matbuot kotibi Yuliya Mendel.
Ma’lumot uchun, 2020-yilning noyabr oyida Vladimir Zelenskiyda koronavirus aniqlangan. Zelenskiyning o‘zi ham Facebook’dagi sahifasida COVID-19’ga testi ijobiy chiqqanini tasdiqlagan. O‘shanda prezident o‘zini yaxshi his qilayotganini va ishlashda davom etib, kasallikni yengib o‘tishiga ishonishini ta’kidlagan.
Eslatib o‘tamiz, Ukraina hukumati koronavirus sababli joriy qilingan karantin muddatini 30-aprelgacha uzaytirdi. 24-fevraldan mamlakat karantinning moslashuvchan shakliga o‘tdi. Hududlarga epidemiologik xavfning to‘rt darajasidan biri beriladi — “yashil”, “sariq”, “to‘q sariq” yoki “qizil”.
Avval Hindiston bosh vaziri Narendra Modi koronavirusga qarshi mamlakatda ishlab chiqarilgan COVAXIN vaksinasining birinchi dozasini olgani, Dunyoning eng badavlat kishilaridan biri, Berkshire Hathaway bosh direktori Uorren Baffet Pfizer/BioNTech kompaniyasining vaksinasi bilan koronavirusga qarshi emlangani haqida xabarlar berilgan.
Shuningdek, 12-fevralda Turkiya prezidenti Rajab Toyyib Erdo‘g‘on unga koronavirusga qarshi vaksinaning ikkinchi dozasi yuborilganini ma’lum qilgan, Erdog‘on vaksinaning birinchi dozasini 14-yanvarda qabul qilib olgandi.
Bundan avval Shahzoda Charlz va uning rafiqasi, BMT bosh kotibi, Bill Geyts hamda Argentina prezidenti koronavirus vaksinasi bilan emlangan.
Izoh (0)