Ukraina 24-yanvardan boshlab qat’iy lokdaunni bekor qilish va koronavirus tufayli joriy qilingan avvalgi cheklovlarga qaytishni rejalashtirmoqda. Bu haqda bosh vazir Denis Shmigal “Interfaks”ga bergan intervyusida ma’lum qilgan.
Mamlakatda kuchaytirilgan karantin choralari 8-yanvarda joriy qilingan va u 24-yanvargacha davom etishi belgilangandi.
“Hozir biz Yangi yildan Rojdestvogacha shakllangan zanjirni uzmoqdamiz. Agar biz ushbu qishki ta’tilni tashkillashtirmaganimizda fevral oyida tibbiy tizimimiz dosh berolmaydigan ko‘rsatkichga yetgan bo‘lardik”, — deb ta’kidlagan vazir. — Boshlanayotgan to‘lqinni pasaytirib, fevral oyida kasallanganlar soni ortishiga yo‘l qo‘ymaslik uchun yilning nisbatan faolsiz vaqtida Yevropada eng yumshoq lokdaun joriy etishimiz mumkin bo‘lsa, nima uchun odamlarning hayoti va sog‘lig‘ini xavf ostiga qo‘yishimiz kerak?”.
Shmigal lokdaunning asosiy maqsadi aholining harakatlanishini cheklash bo‘lganligini ta’kidlagan. Uning aytishicha, hukumat koronavirusga qarshi vaksina olingunga qadar sog‘liqni saqlash tizimini zo‘riqtirmaslikka harakat qilgan. Vaksina fevral oyiga qadar yetkazib berilishi kutilmoqda.
Mavzuga doir: Vladimir Zelenskiy Ukrainada yaratilayotgan koronavirusga qarshi vaksina takrorlanmas ekanligini aytdi
Dekabr oyi boshlarida Ukraina sog‘liqni saqlash vaziri Maksim Stepanov mavsumiy gripp va O‘RVI bilan kasallanish fonida lokdaun joriy qilishni taklif qilgandi. Cheklovlar sog‘liqni saqlash tizimiga yuklamani kamaytirishi kerak, degan edi vazir.
Lokdaun paytida paytida mamlakatda kafe, bar va restoranlar yopildi, ammo uyga olib ketish va yetkazib berish uchun ishlashda davom etdi. Bozorlar, fitnes zallari va ko‘ngilochar muassasalar ham ishlamadi, ommaviy tadbirlar taqiqlandi. Bundan tashqari maktablar va OTMlar yopilgan, ammo bolalar bog‘chalari ishlashda davom etgan.
Shuningdek, oziq-ovqat do‘konlari, banklar, dorixonalar va pochta bo‘linmalari o‘z ishini davom ettirdi. Jamoat transporti faoliyati ham cheklanmadi.
Jons Hopkins ma’lumotlariga ko‘ra, pandemiya boshidan buyon Ukrainada 1,2 milliondan ortiq kishida COVID-19 aniqlandi, 21,8 ming kishi vafot etdi, 902,4 ming kishi sog‘aydi.
Izoh (0)