Turkiya prezidenti Rajab Toyyib Erdo‘g‘on 14-yanvar kuni OAV ishtirokida Xitoyning CoronaVac kompaniyasi tomonidan ishlab chiqarilgan koronavirus vaksinasining birinchi dozasi bilan emlandi, deya xabar bermoqda Anadolu agentligi.

Foto: Anadolu

Prezidentni emlash jarayoni Anqara kasalxonasidan to‘g‘ridan to‘g‘ri efirda namoyish etildi.

Erdo‘g‘onning ta’kidlashicha, Turkiyada COVID-19 vaksinasini qabul qilgan tibbiyot xodimlari soni 300 mingga yaqinlashdi.

“Muvaffaqiyatli emlash dasturimiz doirasida 254 ming sog‘liqni saqlash xodimi birinchi dozada emlandi. Men ham ularga qo‘shilib emlandim”, – dedi Turkiya rahbari.

Prezident Erdo‘g‘on mamlakatning barcha aholisini iloji boricha tezroq emlashga umid bildirdi. Uning ta’kidlashicha, Turkiya yana 25-30 million dozada koronavirus vaksinasini sotib oladi.

Davlat rahbari bilan birga hukmron Adolat va taraqqiyot partiyasi rahbariyati a’zolari ham emlangan.

Shuningdek, prezident mamlakat siyosatchilarini koronavirusga qarshi emlash kampaniyasini rivojlantirishga hissa qo‘shishga chaqirdi.

Avvalroq Turkiya prezidenti Rajab Toyyib Erdo‘g‘on Telegram’da rasmiy kanalini ochgani hamda mamlakatda Xitoy vaksinasi bilan emlash qachon boshlanishini ma’lum qilgani haqida xabar berilgandi.