Xalqaro astronavtika kongressi (International Astronautical Congress — IAC) 2028-yilda Samarqandda o‘tkazilishi va unga Ilon Mask tashrif buyurishi mumkin.
“O‘zbekkosmos” agentligi matbuot xizmatining ma’lum qilishicha, agentlik vakillari Xalqaro astronavtika kongressini Samarqandda o‘tkazish taklifini ilgari surdi. Ushbu nufuzli tadbirni O‘zbekistonda o‘tkazish imkoniyatlari bilan yaqindan tanishish maqsadida Xalqaro astronavtika federatsiyasi ijrochi direktori Kristian Fayxtinger Samarqand va Toshkent shahrida tekshiruv – kuzatuv ishlarini olib borib, kongressni qabul qilishga tayyorlik darajasi, moddiy-texnik baza, transport va mehmonxona infratuzilmasi, xavfsizlik, ijtimoiy tadbirlarni tashkil etish hududlari bilan yaqindan tanishdi, vazirlik va idoralar mas’ullari bilan uchrashuvlar o‘tkazdi.
Xalqaro astronavtika kongressi Milan (2024), Boku (2023), Parij (2022), Dubay (2021), Vashington (2019), Bremen (2018) va Adelaida (2017) kabi shaharlarda o‘tkazildi va mazkur mamlakatlar uchun sezilarli natijalarni berdi. Jumladan, BAAda IAC-2021 milliy kosmik dasturni faollashtirishda asosiy omil bo‘ldi, xususan “Hope” missiyasining Marsga uchirilishi va Milliy kosmik fan markazining tashkil etilishiga turtki bo‘ldi.
2025-yilning 29-sentyabr 3-oktyabr kunlari ushbu kongressga mezbonlikni Avstraliya qabul qilib oladi.
Ma’lumotlarga ko‘ra, o‘tkazilishi rejalashtirilayotgan xalqaro astronavtika kongressiga Ilon Mask tashrifi ham kutilmoqda. Ma’lumki, Mask shu vaqtgacha o‘tkazilgan mazkur anjumanlarga maxsus vakil sifatida qatnashib, muvaffaqqiyatli loyihalarni ilgari surib kelgan.
Jahon kosmik maydonidagi eng yirik xalqaro anjumanlardan biri bo‘lgan International Astronautical Congress (IAC) har yili butun dunyodan 10 mingga yaqin kosmos sanoati yetakchilari, sohada ilmiy tadqiqotlar olib borayotgan yetakchi kompaniya va agentliklar vakillarini bir muloqot platformasi atrofida jamlaydi.
Izoh (0)