O‘zbekiston tashqi ishlar vaziri Abdulaziz Komilov amaliy tashrif bilan Moskvaga boradi. Ta’kidlanishicha, Rossiya tashqi ishlar vaziri Sergey Lavrov bilan muzokaralar rejalashtirilgan. Bu haqda Rossiya TIV matbuot xizmatiga tayanib, Repost ma’lum qildi.
“O‘zbekiston tashqi ishlar vaziri Abdulaziz Komilov 1–2-mart kunlari Rossiyaga tashrif buyuradi. U Rossiya tashqi ishlar vaziri Sergey Lavrov bilan muzokaralar olib boradi. Rejalashtirilgan uchrashuv davomida ikki tomonlama siyosiy, savdo-iqtisodiy va madaniy-gumanitar hamkorlikning barcha sohalari ko‘rib chiqilishi kutilmoqda”, – deyiladi xabarda.
Uchrashuv davomida Shavkat Mirziyoyevning Rossiyaga bo‘lajak tashrifini muhokama qilish rejalashtirilgan.
Qayd etilishicha, O‘zbekiston Prezidentining Rossiyaga bo‘lib o‘tadigan davlat tashrifi doirasida davlatlararo, hukumatlararo va idoralararo hujjatlarni imzolash ko‘zda tutilgan.
Bundan tashqari, tashqi ishlar vazirliklarining vazifalari 2021-yil doirasida muhokama qilinadi. Rossiya va O‘zbekiston hukumat rahbarlari darajasida qo‘shma komissiyaning ikkinchi yig‘ilishi, hukumatlararo komissiyaning 22-yig‘ilishi, ikki mamlakat o‘rtasidagi iqtisodiy hamkorlik, shuningdek, koronavirus infeksiyasining tarqalishiga qarshi kurashda o‘zaro yordam shular jumlasidan.
Bundan avval Abdulaziz Komilov Afg‘oniston prezidenti qabulida bo‘lib, unga Shavkat Mirziyoyevning maktubini topshirgani, Tojikiston prezidenti Emomali Rahmon, Qozog‘iston prezidenti Qosim-Jo‘mart To‘qayev hamda Turkmaniston prezidenti Gurbanguli Berdimuhamedov bilan uchrashgani haqida xabar berilgandi.
Izoh (0)