O‘zbekiston Respublikasi Prezidenti Shavkat Mirziyoyevning 2020-yil 12—13-noyabr kunlari Qashqadaryo viloyatiga tashrifi davomida uglevodorod xomashyo zaxiralarini oshirish, tabiiy gaz qazib chiqarish hajmini ko‘paytirish bo‘yicha bergan topshiriqlarining ijrosini ta’minlash maqsadida joylarda olib borilayotgan ishlar holati o‘rganildi.
Qilingan har bir ish va rejalashtirilgan vazifalarni joyida o‘rganish maqsadida, “O‘zbekneftgaz” AJ boshqaruv raisi Mehriddin Abdullayev boshchiligida Qashqadaryo viloyatida tashkil qilingan maxsus shtabda sayyor yig‘ilish o‘tkazildi.
Muhokamalar asosida o‘tkazilgan uchrashuvda uglevodorod xomashyo zaxiralarini oshirish bo‘yicha mas’ul bo‘lgan O‘zbekiston Respublikasi Davlat geologiya va mineral resurslar qo‘mitasi raisining o‘rinbosari Nodir Muhutdinov, Neft va gaz ilmiy-tadqiqot, loyihalash instituti rahbari Ulug‘bek Nazarov, “O‘zbekgeofizika” AJ rahbari Anvar Toshqulov, Neft va gaz konlari geologiyasi hamda qidiruvi instituti rahbari Ravshanjon Yusupjonovlar ishtirok etishdi.
O‘rganish davomida, joriy yil boshidan buyon bajarilgan geologiya qidiruv ishlarining bugungi holati, 2020-yilda uglevodorod zaxiralarini ko‘paytirish ishlarining natijalari, bu borada 2021-yilda belgilangan vazifalarni amalga oshirish maqsadida olib borilayotgan ishlar, shuningdek, geologiya qidiruv ishlarini samarali tashkil etish va jadallashtirish masalalari ko‘rib chiqildi.
Shuningdek, 2020-yilda geologiya qidiruv ishlarini olib borish va rivojlantirish ishlariga “O‘zbekneftgaz” AJ tomonidan o‘z vaqtida yetarli miqdordagi moliyaviy mablag‘larning yo‘naltirilishi natijasida 750 kvadrat kilometr 3D seysmik qidiruv ishlarining bajarilganligi, 6 ta yangi maydonlarning burg‘ilash ishlariga kirishilganligi, 76 ming pogon metrdan ortiq burg‘ilash ishlari amalga oshirilganligi, 33 ta quduqlar qurilish bilan tugatilganligi va buning natijasida 1 ta “O‘rtaqum” yangi koni ochilib, yana 2 ta “O‘rtabuloq” maydonining terrigen Yura yotqiziqlarida hamda “Janubiy Aqqum” maydonida yangi tabiiy gaz zaxiralari aniqlanganligi va yakunda 20,1 milliard kub metr tabiiy gaz hamda 1,0 million tonna suyuq uglevodorod zaxiralari o‘stirilganligi qayd etib o‘tildi.
“O‘zbekneftgaz” AJ tomonidan quduqlarni burg‘ilashni o‘z vaqtida tashkil qilish maqsadida zarur material texnik resurslarni sotib olish uchun 65 million dollarlik shartnomalar tuzilib, jihozlarni yetkazib berish ishlari boshlandi.
Bu borada qilingan ishlar, belgilangan vazifalar borasida “O‘zbekneftgaz” AJ Geologiya departamenti rahbari Gulmurod Mavlonov o‘z hisobotini taqdim qildi.
2021-yilda yangi konlarni ochish va zaxiralarni ko‘paytirish maqsadida “Sho‘rtan” va “Uchqir” konlari hamda ularning atrofidagi hududlarda 1370 kvadrat kilometr 3D seysmik qidiruv ishlarini bajarish, jamiyat balansidagi 4 ta hamda Davlat geologiya qo‘mitasi tomonidan taklif etilgan 15 ta, jami 19 ta yangi maydonlarda 170 ming pogon metr hajmda izlov qidiruv burg‘ilash ishlarini olib borish, 50 ta izlov qidiruv quduqlarini qurilish bilan tugatish mo‘ljallangan.
Bunda va burg‘ilash jarayonlarini uzluksiz tashkil etish, tegishli mutaxassislarni jalb etgan holda bajarilayotgan ishlarni har bir hudud kesimida, alohida o‘rganish natijasida yil yakuniga qadar 35 milliard kub metr tabiiy gaz va 900 ming tonna suyuq uglevodorod zaxiralarini ko‘paytirish belgilab olingan.
“O‘zbekneftgaz” AJ boshqaruv raisi tomonidan geologiya qidiruv ishlarining natijadorligi maydonlardagi burg‘ilash dastgohlarining yetarli darajada moddiy texnik resurslar bilan ta’minlanganligiga bog‘liq ekanligi ta’kidlanib, bu borada yuzaga kelayotgan muammolarni bartaraf etish bo‘yicha ishlab chiqilgan tadbirlar muhokama qilindi. Tegishli rahbar va mas’ul mutaxassislarga zarur ko‘rsatmalar berildi.
“O‘zneftgazburg‘ilash ishlari” korxonasi rahbari Ulfat Amonovga bu borada mavjud kamchiliklarni hal qilish maqsadida kerakli topshiriqlar berildi.
“O‘zbekneftgaz” AJ burg‘ilash ishlarini muvofiqlashtirish departementi Elyor Mamatovga burg‘ilash ishlarini tez va sifatli bajarish uchun barcha imkoniyatlarni ishga solish bo‘yicha topshiriqlar berildi.
Geologiya qidiruv ishlari doirasidagi burg‘ilash va boshqa zarur ishlarni bajarishga 10 ga yaqin burg‘ilash, geofizika va ilmiy-tadqiqot ishlariga ixtisoslashgan korxonalar pudratchi sifatida jalb etilgan.
O‘rganishlar davomida geologiya qidiruv ishlarini jadallashtirish borasida Davlat geologiya va mineral resurslar qo‘mitasi bilan yo‘lga qo‘yilgan hamkorlik masalalari muhokama etildi.
Shuningdek, “O‘zbekgeofizika” AJ va Neft va gaz konlari geologiyasi hamda qidiruvi instituti davlat korxonalari tomonidan buyurtma asosida bajarilayotgan ishlar va tadqiqotlarning samaradorligi masalalari ham tahlil qilindi.
“O‘zbekgeofizika” AJ va Neft va gaz konlari geologiyasi hamda qidiruvi instituti tomonidan “O‘zbekneftgaz” AJ mablag‘lari hisobiga bajarilayotgan ishlarga zamonaviy geofizik uskunalar va eng yangi texnologiyalardan foydalangan holda neft va gaz sohasida keng ko‘lamli qidiruv ishlarini amalga oshirish kerakligi ta’kidlandi.
Bu borada “O‘zbekneftgaz” AJ tomonidan geologiya qidiruv ishlari dasturi doirasida 40 dan ortiq shartnomalar moliyalashtirilayotganligi ushbu ishlarni bajarish uchun mustahkam zamin yaratishi alohida ta’kidlandi.
O‘z navbatida, dasturiy komplekslarni qo‘llash orqali ularni zamonaviy talablarga mos holda amalga oshirishni boshlash zarurligi qayd etildi.
So‘nggi yillarda yangi konlarini ochishni ilmiy asoslash va geologiya qidiruv ishlarining yangi yo‘nalishlarini aniqlash bo‘yicha tadqiqotlar yetarli darajada puxta bajarilmayotganligi va bu ishlarga yangicha yondashish zarurligi, zaxiralarni hisoblash ishlaridagi bir qator kamchiliklarni bartaraf etish lozimligi, izlov burg‘ilash ishlarini loyihalashtirish ishlarini zamonaviy darajada qayta tashkil etish talab etayotganligi, shuningdek 3D seysmik qidiruv ishlarini bajarishni yangi bosqichga ko‘tarish talab etilayotganligi ta’kidlandi.
Boshqaruv raisi tomonidan “O‘zbekneftgaz” AJ Konlarni ishlatish departementi rahbari Sirojiddin Mallayev va Sho‘rtan, Ustyurt, Gazli, Vodiy, Muborak neft va gaz qazib chiqarish boshqarmalari bosh geologlariga geologiya qidiruv ishlari natijasida ochilgan yangi konlar va mahsulot olingan quduqlarni qisqa muddatlarda ishlab chiqarishga jalb qilish, bu orqali tabiiy gaz qazib chiqarishni ko‘paytirish, joylarda olib borilayotgan ishlarning natijadorligiga erishish, ishlarni jadallashtirish borasida tegishli ko‘rsatmalar berildi.
Joylardagi ishchi xodimlar va mutaxasislarning samarali ishlashi va dam olishi uchun yaratilgan sharoitlar ham ko‘zdan kechirilib, ularning salomatligi eng muhim masalalardan biri ekanligi ta’kidlandi.
Tashkilotlar rahbarlari va mas’ul xodimlarga ishlab chiqarish jarayonlarini barcha zarur anjomlar bilan ta’minlash hamda sanoat va texnika xavfsizligi talablariga qat’iy rioya qilish ustidan nazoratni kuchaytirish vazifasi topshirildi.
“O‘zbekneftgaz” AJ tomonidan geologiya qidiruv ishlarini jadallashtirish, zaxiralarni o‘stirish va uglevodorod xomashyosi qazib olishni qo‘paytirish borasidagi amaliy ishlar davom ettirilmoqda.
Neft va gazni qazib chiqarish va qayta ishlashga innovatsion texnologiyalarni joriy qilishda, loyihalashtirish va ilmiy kuzatuvga e’tibor berilib, ayni shu orqali neft va gaz konlarini ochish, samaradorligini orttirish, uglevodorod xomashyosi zaxirasini ko‘paytirish rejalashtirilgan.
“O‘zbekneftgaz” AJ matbuot xizmati
Izoh (0)