Tergov departamenti internetda Qashqadaryoda viloyatining Kitob tumanida amakivachchasini urib, uning bir ko‘zini ko‘r qilgan yigit nima sababdan jazosiz qolib kelayotgani borasida tarqalgan xabarlarga munosabat bildirdi.
Ma’lumotlarga ko‘ra, 2020-yilning 6-mart kuni Kitob tumanida yashovchi fuqaro (ayol) IIBga ariza bilan murojaat qilib, 2-mart kuni qarindoshi 25 yoshli Dadaxon X. spirtli ichimlik ta’sirida mast holda bo‘la turib, uning o‘g‘li 17 yoshli Shahzod U.ning chap ko‘ziga qo‘li hamda pichoq bilan ko‘krak sohasiga urganligini bildirib, unga nisbatan qonuniy chora ko‘rishni so‘ragan.
Kitob tumani IIB huzuridagi Tergov bo‘limi tomonidan o‘tkazilgan tergovga qadar tekshiruv harakatlari davomida Shahzod U. shu kuni soat taxminan 08:30 da uyining kirish darvozasi taqillagani sababli, darvozani ochmoqchi bo‘lganida Dadaxon X. darvozani qattiq ochib yuborgani tufayli darvoza tutqichi chap ko‘z sohasiga tegib jarohatlagani uchun yerga yiqilganini va qo‘lida bo‘lgan oshxona pichog‘i ko‘krak sohasi old qismini kesganligini ma’lum qilgan. Ushbu holatni Dadaxon X. ham tasdiqlagan.
Sud tibbiy ekspertiza xulosasida, Shahzod U. “og‘ir” tan jarohati olgani ko‘rsatilgan.
Mazkur holat yuzasidan Kitob tumani IIB huzuridagi Tergov bo‘limi tomonidan Dadaxon X.ga nisbatan Jinoyat kodeksining 111-moddasi 2-qismi (ehtiyotsizlik orqasida badanga o‘rtacha og‘ir yoki og‘ir shikast yetkazish) bilan jinoyat ishi qo‘zg‘atilgan.
Bir qator tergov harakatlari o‘tkazilib, jinoyat ishi tomonlarning yarashganligi munosabati bilan Jinoyat ishlari bo‘yicha Shahrisabz shahar sudiga yuborilgan va bu haqda ajrim chiqarilgan.
Biroq jabrlanuvchining onasi sud ajrimidan norozi bo‘lib, Dadaxon X. farzandini davolatish uchun yetarli mablag‘ni bermagani sababli ishni yarashuv tartibida tugatish haqidagi ajrimni bekor qilishni so‘rab, jinoyat ishlari bo‘yicha Qashqadaryo viloyati sudi tomonidan jinoyat ishini kassatsiya tartibida ko‘rib chiqilishini so‘ragan. Sudning ajrimiga ko‘ra, avvalgi ajrim bekor qilinib, jinoyat ishi viloyat IIB huzuridagi Tergov boshqarmasiga qo‘shimcha tergov harakatlarini olib borish uchun yuborilgan.
Tergov boshqarmasi tomonidan o‘tkazilgan tergov harakatlarida quyidagilar aniqlangan:
- 2020-yil 2-mart kuni soat 20:30 da Shahzod U.ning chap ko‘z sohasidagi olgan “og‘ir” tan jarohati xonadonga kirish darvozasi tegishi oqibatida yetkazilmagani, balki Dadaxon X. qo‘lining mushti bilan Shahzod U.ning chap ko‘z sohasiga bir necha marotaba urishi oqibatida yetkazilgani. Shuningdek, janjal vaqtida Shahzod U.ning qo‘lidagi oshxona pichog‘ini olib qo‘yish jarayonida uning ko‘krak sohasiga pichoqning tegib ketishi oqibatida Shaxzod U.ga hayot uchun xavfli bo‘lmagan “yengil” tan jarohati yetkazilgani aniqlangan.
- 2021-yil 8-fevral kuni Dadaxon X.ga nisbatan Jinoyat kodeksining 104-moddasi 2-qismi “v” bandi (o‘ta shafqatsizlik bilan qasddan badanga og‘ir shikast yetkazish) bilan ayb e’lon qilinib, “qamoqqa olish” tarzidagi ehtiyot chorasi qo‘llanilgan.
- 2021-yil 20-fevral kuni jinoyat ishi Jinoyat kodeksining 104-moddasi 2-qismi “v” bandidan 104-moddasi 1-qismi (qasddan badanga og‘ir shikast yetkazish)ga qayta malakalangan.
- 2021-yil 20-fevral kuni tergov tamomlanib, ayblanuvchi va uning himoyachisiga tergov tamomlangani e’lon qilinib, jinoyat ishi hujjatlari bilan tanishtirilgan.
- 2021-yil 22-fevral kuni jinoyat ishi tegishli tartibda mazmunan ko‘rib chiqishlik uchun prokuraturaga yuborilgan.
Izoh (0)