Abdulaziz Komilov Qozog‘iston prezidenti bilan uchrashib, unga Shavkat Mirziyoyevning maktubini topshirdi

18-fevral kuni Nur-Sulton shahriga amaliy tashrif bilan borgan O‘zbekiston tashqi ishlar vaziri Abdulaziz Komilov Qozog‘iston prezidenti Qosim-Jomart To‘qayev bilan uchrashdi. Bu haqda TIV matbuot xizmati xabar berdi.

Uchrashuv davomida Abdulaziz Komilov O‘zbekiston Prezidenti Shavkat Mirziyoyevning Qozog‘iston prezidenti Qosim-Jomart To‘qayevga yo‘llagan maktubini topshirgan.

“Uchrashuv chog‘ida O‘zbekiston—Qozog‘iston strategik sheriklik munosabatlarining bugungi holati va rivojlanish istiqbollari muhokama qilindi”, — deyiladi xabarda.

Tashqi savdo aylanmasi ko‘rsatkichlarini oshirish, sanoat kooperatsiyasini kengaytirish, tadbirkorlik subyektlari va hududlarning o‘zaro aloqalarini jadallashtirish, madaniy-gumanitar tadbirlarni tashkillashtirishga yo‘naltirilgan qo‘shma dastur va loyihalarni ishlab chiqish va amalga oshirish masalalariga alohida e’tibor qaratilgan.

Markaziy Osiyodagi hozirgi vaziyat, mintaqaviy hamkorlikni yanada kengaytirish va chuqurlashtirish bo‘yicha shakllanayotgan imkoniyatlar, shuningdek, yangi istiqbolli bozorlarga birgalikda kirish bo‘yicha rejalar yuzasidan fikr almashilgan. Muzokaralarda tomonlarni qiziqtirgan boshqa masalalar ham ko‘rib chiqilgan.

Qosim-Jomart To‘qayev butun dunyoda yuzaga kelgan vaziyat va pandemiyaga qaramasdan, O‘zbekiston va Qozog‘iston o‘rtasidagi munosabatlar an’anaviy ravishda yuqori darajada ekanligini ta’kidlagan.

Uchrashuv yakunida Qozog‘iston prezidenti O‘zbekiston rahbariga sihat-salomatlik, farovonlik borasidagi iliq tilaklarini bildirib, Shavkat Mirziyoyev epidemiologik vaziyat yaxshilangach Qozog‘istonga tashrif buyurishiga ishonch bildirgan.

Shuningdek, Abdulaziz Komilov Qozog‘istonga tashrifi davomida mamlakat bosh vaziri o‘rinbosari – tashqi ishlar vaziri Muxtar Tleuberdi bilan uchrashib, O‘zbekiston—Qozog‘iston munosabatlarini rivojlantirishning asosiy jihatlarini muhokama qilgan.

Uchrashuvda tomonlarning savdo-iqtisodiy va transport-tranzit salohiyatidan samarali foydalanish, tadbirkorlik subyektlari o‘rtasidagi to‘g‘ridan to‘g‘ri muloqotni rivojlantirish va chegaraoldi hududlar o‘rtasidagi aloqalarni faollashtirish muhimligiga e’tibor qaratilgan. Qozog‘iston tomoni 2021-yilda Toshkent shahrida bo‘lib o‘tadigan “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi xalqaro konferensiyaga taklif qilindi.