O‘zbekiston Oliy Majlis Senati Kengashining majlisi 2021-yil 26-fevral kuni bo‘lib o‘tdi. Majlisni Senat raisi Tanzila Norboyeva olib bordi. Bu haqda Senat matbuot xizmati xabar berdi.
Majlisda O‘zbekiston Oliy Majlis Senatining o‘n uchinchi yalpi majlisini 2021-yil 12-mart kuni chaqirish to‘g‘risida qaror qabul qilindi.
Videokonferensaloqa tarzida o‘tkaziladigan yalpi majlisda bir qator masalalar ko‘rib chiqilishi rejalashtirilgan. “O‘zbekiston Respublikasining Konstitutsiyaviy sudi to‘g‘risida”gi O‘zbekiston Respublikasi Konstitutsiyaviy qonuni, qolaversa, “Davlat xaridlari to‘g‘risida”gi, “Ekologik audit to‘g‘risida”gi, “Dehqon xo‘jaligi to‘g‘risida”gi, “Tomorqa xo‘jaligi to‘g‘risida”gi, “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi O‘zbekiston qonunlari shular jumlasidandir.
Bundan tashqari, O‘zbekiston Oliy Majlis Inson huquqlari bo‘yicha vakili (ombudsman)ning hisoboti, O‘zbekiston Respublikasi ichki ishlar, tashqi ishlar, adliya vazirlarining axborotlari, Surxondaryo viloyati hokimining hududlarni rivojlantirish haqidagi hisoboti eshitilishi nazarda tutilgan.
Shu bilan birga, 2030-yilgacha bo‘lgan davrda barqaror rivojlanish sohasidagi milliy maqsad va vazifalarda nazarda tutilgan Barqaror infratuzilmani yaratish, umumqamrovli va barqaror sanoatlashuv va innovatsiyalarga ko‘maklashish maqsadiga erishish bo‘yicha amalga oshirilayotgan ishlar, qolaversa, davlat xizmatlari ko‘rsatilishi holati yuzasidan Vazirlar Mahkamasiga parlament so‘rovlari yuborish to‘g‘risidagi masalalar ko‘rib chiqilishi rejalashtirilgan.
Shuningdek, mamlakat maxsus iqtisodiy zonalarining raqobatbardoshligini oshirish bo‘yicha qabul qilinayotgan choralar hamda nikohlanuvchi yoshlarni tibbiy ko‘rikdan o‘tkazish samaradorligini oshirish yuzasidan Vazirlar Mahkamasiga yuborilgan parlament so‘rovlari natijalari muhokama qilinishi nazarda tutilgan.
Mavzuga doir: “Hozir parlament butunlay mustaqil” — Tanzila Norboyeva
Izoh (0)