Jinoyat ishlari bo‘yicha Yunusobod tumani sudi, Fuqarolik ishlari bo‘yicha Mirzo Ulug‘bek tumanlararo sudi, Toshkent tumanlararo ma’muriy sudi hamda Toshkent tumanlararo iqtisodiy sudi tomonidan jinoyatlarni jilovlash, jinoyatchilik profilaktikasini yanada takomillashtirish borasida amalga oshirilgan ishlar yuzasidan brifing tashkil qilindi, deb xabar beradi O‘zA.
Ma’lum qilinishicha, Fuqarolik ishlari bo‘yicha Mirzo Ulug‘bek tumanlararo sudida 2020-yil davomida jami 11 276 fuqarolik ishi tamomlangan. Ko‘rilgan ishlarning 7393 tasi bitimlarga doir nizolar bo‘lsa, 1485 tasi nikohdan ajratish bilan bog‘liq bo‘lgan. Qolganlarini mehnat, mulk huquqi va boshqalar tashkil etgan.
“Ajrashishning asosiy sabablaridan biri – aksariyat yoshlarimiz oila qurishga tayyor emas. Ajrimlar sonini kamaytirishga erishish va mustahkam oilani shakllantirish uchun nikohga kiruvchilarga e’tibor kuchaytirilishi maqsadga muvofiq”, — deyiladi xabarda.
Tadbirda nikohga kirish jarayonini murakkablashtirish zarurligi taklif etilgan. “Hozirgi kunda FHDYoga ariza topshirganidan so‘ng bir oy o‘tib oila qurish mumkin. Vaholanki, bu muddatda ikki yosh hatto bir-birini tanib olishga ham ulgurmaydi”, — deya qayd etiladi xabarda.
Shu bois nikohga kirish muddatini bir oy emas, uch oyga uzaytirish lozimligi ta’kidlangan. Nikohdan o‘tib, so‘ng farzandini tirik yetim qilgandan ko‘ra, uch oylik muddatda bir-biriga ma’qul kelmasa, o‘z yo‘lida davom etgani ma’qul.
Eslatib o‘tamiz, 26-fevral kuni Prezident Shavkat Mirziyoyev raisligida o‘tkazilgan videoselektor yig‘ilishida oiladagi kelishmovchiliklar sababli ajrimlar soni ko‘pligiga aholida e’tibor qaratilgandi.
“Oiladagi kelishmovchiliklar sababli ajrimlar soni ham (2020-yili 28 mingdan ziyod) yuqoriligicha qolmoqda. Qashqadaryoda – 2 ming, Xorazmda – 1,1 ming, birgina Romitan tumanida – 110 ta ajrim qayd etilgan. Er-xotin o‘rtasidagi doimiy janjal, xiyonat, kuch ishlatish va migratsiya ajrimlarning 70 foiziga sabab bo‘lmoqda”, — deya qayd etgan davlat rahbari.
Izoh (0)