Ўзбекистон ташқи ишлар вазири Абдулазиз Комилов амалий ташриф билан Москвага боради. Таъкидланишича, Россия ташқи ишлар вазири Сергей Лавров билан музокаралар режалаштирилган. Бу ҳақда Россия ТИВ матбуот хизматига таяниб, Repost маълум қилди.
«Ўзбекистон ташқи ишлар вазири Абдулазиз Комилов 1–2 март кунлари Россияга ташриф буюради. У Россия ташқи ишлар вазири Сергей Лавров билан музокаралар олиб боради. Режалаштирилган учрашув давомида икки томонлама сиёсий, савдо-иқтисодий ва маданий-гуманитар ҳамкорликнинг барча соҳалари кўриб чиқилиши кутилмоқда», – дейилади хабарда.
Учрашув давомида Шавкат Мирзиёевнинг Россияга бўлажак ташрифини муҳокама қилиш режалаштирилган.
Қайд этилишича, Ўзбекистон Президентининг Россияга бўлиб ўтадиган давлат ташрифи доирасида давлатлараро, ҳукуматлараро ва идоралараро ҳужжатларни имзолаш кўзда тутилган.
Бундан ташқари, ташқи ишлар вазирликларининг вазифалари 2021 йил доирасида муҳокама қилинади. Россия ва Ўзбекистон ҳукумат раҳбарлари даражасида қўшма комиссиянинг иккинчи йиғилиши, ҳукуматлараро комиссиянинг 22-йиғилиши, икки мамлакат ўртасидаги иқтисодий ҳамкорлик, шунингдек, коронавирус инфекциясининг тарқалишига қарши курашда ўзаро ёрдам шулар жумласидан.
Бундан аввал Абдулазиз Комилов Афғонистон президенти қабулида бўлиб, унга Шавкат Мирзиёевнинг мактубини топширгани, Тожикистон президенти Эмомали Раҳмон, Қозоғистон президенти Қосим-Жўмарт Тўқаев ҳамда Туркманистон президенти Гурбангули Бердимуҳамедов билан учрашгани ҳақида хабар берилганди.
Изоҳ (0)