Toshkent shahar IIBB ijtimoiy tarmoqlarda “San’at instituti talabasi 5 kundan beri komada” deya izoh yozilgan holda tarqalgan suratga munosabat bildirdi.
“O‘zbekiston san’at va madaniyat institutining 21 yoshli talabasi 5 kundan buyon komada qolmoqda. Namanganlik yigitni kursdoshining ukasi ‘turtib yuborgani’ aytilyapti”, — deyiladi tarqalgan xabarlarda.
Poytaxt IIBB axborot xizmatining ma’lum qilishicha, 19-fevral kuni soat 12:30 larda 18 yoshli Madamin A. va O‘zbekiston davlat san’at va madaniyat instituti talabasi 20 yoshli Jahongir A. o‘rtasida kelib chiqqan mojaro janjalga aylangan. Madamin A. qo‘l jangi usulini qo‘llagan, natijada ikkalasi yerga yiqilgan. Yiqilish jarayonida Jahongir A. beton to‘siqqa boshi bilan urilgan. Oqibatda u tan jarohatlari bilan kasalxonaga yotqizilgan.
Mazkur holat yuzasidan Mirzo Ulug‘bek tumani IIO FMB tergov bo‘limi tomonidan Jinoyat kodeksining 104-moddasi (qasddan og‘ir tan jarohati yetkazish) alomatlari bilan jinoyat ishi qo‘zg‘atilgan. Madamin A. jinoyat ishiga gumon qilinuvchi sifatida jalb qilingan. Tergov davom etmoqda.
Shuningdek, ma’lum qilinishicha, hozirda Jahongir A. jarrohlik amaliyotidan o‘tgan va koma holatidan chiqqan, shifokorlar uning ahvolini mo‘tadil deb baholamoqda.
Izoh (0)