Bishkek shahriga amaliy tashrif bilan kelgan O‘zbekiston t ashqi ishlar vaziri Abdulaziz Komilov 2021-yil 27-fevral kuni Qirg‘iziston prezidenti Sadir Japarov tomonidan qabul qilindi, deya xabar bermoqda vazirlik matbuot xizmati.
Vazir O‘zbekiston Prezidenti Shavkat Mirziyoyevning Qirg‘iziston prezidenti Sadir Japarovga yo‘llagan maktubini topshirdi.
Bo‘lib o‘tgan suhbat chog‘ida tomonlar siyosiy, savdo-iqtisodiy, madaniy-gumanitar va boshqa sohalardagi ikki tomonlama munosabatlarning rivoji haqida fikr almashdi.
Markaziy Osiyoda so‘nggi yillarda shakllangan xavfsizlik, barqarorlik va yaxshi qo‘shnichilik muhitini yanada mustahkamlash masalalari ko‘rib chiqildi.
Qayd etilishicha, bugun dengiz portlariga va yangi tashqi bozorlarga eng qisqa yo‘l ochadigan transport yo‘laklari tizimini shakllantirish uchun keng imkoniyatlar yaratilmoqda, bu o‘z navbatida, mintaqalararo savdo-sotiqning jadallashuvi, tranzit yuk tashuvlarini orttirish, xom-ashyo, asbob-uskunalar va tayyor mahsulotlarni tashish narxining pasayishiga xizmat qilishi ta’kidlandi.
Uchrashuvda tomonlarni qiziqtirgan boshqa masalalar ham muhokama qilindi.
Bundan avval Abdulaziz Komilov Ashraf G‘ani, Emomali Rahmon, Qosim-Jo‘mart To‘qayev hamda Gurbanguli Berdimuhamedov bilan uchrashgani haqida xabar berilgandi.
Izoh (0)