“O‘rgimchak odam”ning yangi qismi kadrlari bilan bo‘lishgan Tom Xolland, Zendeya va Jeykob Batalon film nomi yuzasidan tortishib qoldi

Tom Xolland, Zendeya va Jeykob Batalon ijtimoiy tarmoqdagi sahifalarida “O‘rgimchak odam”ning yangi sarguzashtlari haqidagi trilogiyaning yangi qismiga oid suratlar bilan bo‘lishdi. Aktyorlardan har biri film qanday atalishini oshkor qilgan, ammo ta’kidlangan variantlar bir-biriga to‘g‘ri kelmagan, deb yozadi Esquire.

Birinchi postni “O‘rgimchak odam” rolining ijrochisi Tom Xolland joylagan. Unda sikvelning nomi “O‘rgimchak odam: Uyga qo‘ng‘iroq” (Spider-Man: Phone Home) ekanligi aytilgan.

Zendeya tomonidan joylangan suratda esa film nomi “O‘rgimchak odam: Og‘ayni” (Spider-Man: Home Slice) bo‘lishi ta’kidlangan. Jeykob Batalonning versiyasida esa uchinchi qism “O‘rgimchak odam: Buzg‘unchi” (Spider-Man: Home-Wrecker) deb atalishi yozilgan.

Aktyorlar film nomi har kimda har xil ekani sabab hayratini yashira olmagan. Alal-oqibat Xolland, Zendeya va Batalon ushbu tushunmovchilikka rejissor Jon Uotts sababchi, degan fikrga kelgan.

https://twitter.com/Marvel/status/1364632204395962371

Keyinroq esa Marvel’ning Twitter sahifasida premyerasi 2021-yilning 17-dekabrida bo‘lishi kutilayotgan sikvelning uchinchi qismi “O‘rgimchak odam: Uyga yo‘l yo‘q” deb nomlanishi ma’lum qilingan.