2001-yilda “Uzuklar hukmdori” va “Garri Potter” filmlari ekranga chiqqan edi. Oradan 20 yil o‘tib Redkliff va Vud ularni muhokama qilish uchun uchrashdi

2001-yilda “Garri Potter va hikmatlar toshi” va “Uzuklar hukmdori” filmlari namoyish etilgan. Dunyo bo‘ylab mashhurlikka erishgan filmlarning 20 yilligi sharafiga Empire jurnali Garri Potter va Frodo Beggins rolini ijro etgan Deniel Redkliff va Elayja Vud bilan suhbatlashdi. Bu haqda “Kinopoisk” ma’lum qildi.

Frodo va Garri bir-birini taniydimi?

Redkliff va Vud Empire’ga intervyu berishdan oldin faqatgina bir marta “Garri Potter” filmining suratga olish maydonchasida ko‘rishgan. O‘shanda Vud Piter Jekson bilan tashrif buyurgan edi. Redkliffning yoshi 13, Vudniki 22 da bo‘lgan.

https://www.instagram.com/p/CLMzZb0BOc4/?utm_source=ig_embed

“Garri Potter” va “Uzuklar hukmdori” filmlari musobaqalashgani rostmi?

Ommaviy axborot vositalari doimiy ravishda ikkita franshizani bir-biriga qarshi qo‘yib, tomoshabinlar o‘rtasida raqobat tuyg‘usini paydo qildi. Biroq aktyorlar hech qachon raqobatni sezmagan. To‘g‘ri, ko‘plab tomoshabinlar 2000-yillarning boshlarida parallel ravishda chiqarilgan franshizalarni chalkashtirib yuborgan va aktyorlarni ham bir-biri bilan adashtirgan. Redkliffning ta’kidlashicha, ikkisining ham bo‘ylari past, moviy ko‘z va jigarrang soch bo‘lsa-da, ularni aslida bir-biriga o‘xshash jihati yo‘q. Yaponiyada bo‘lib o‘tgan taqdimotda Redkliff hattoki “Uzuklar hukmdori” filmi suratiga “Men Elayja Vud emasman” deb yozgan edi.

“Garri Potter” Redkliffning bolaligini o‘g‘irladimi?

Rekliffning so‘zlariga ko‘ra, u va uning hamkasblari shu qadar ko‘p ijod qilganidan mashhurlikning hayotiga ta’sirini anglashga ham ulgurmagan. Aktyor suratga olish ishlaridan keyin bor-yo‘g‘i bir chorakka bo‘lsa ham maktabga qaytishni yomon ko‘rar edi. “Mening bolaligim odatdagidek o‘tgan, deb ayta olmayman, lekin u juda qiziqarli va muhabbatga to‘la edi. Men o‘rta sinf ingliz bolasi edim va boshqa bolalar qatori maktabga borardim. Suratga olish maydonchasida esa umuman boshqa tabaqadagi odamlar bor edi va bu menga dunyoni yanada kengroq tushunishga yordam berdi”.

Garri Potter haqidagi “Afsungarlar toshi” filmi suratga olinishdan avval Redkliff dastlab ikki kartina uchun shartnoma imzolagan. O‘sha vaqtda uning o‘zi hali J.K. Roulingni kitoblarini o‘qimagan edi. Aktyor uzoq va keng ko‘lamli loyihaning bir qismiga aylanayotganini sezmagan, biroq yillar davomida u asarni yoqtirib qoldi. Har yili uning ota-onasi suratga tushishni davom ettirasanmi, deya so‘rar, aktyor “ha” deb javob berar edi.

Redkliffning so‘zlariga ko‘ra, “Garri Potter” unga hayotda nima xohlayotganini erta anglab yetishi uchun nihoyatda foydali bo‘lgan. Biroq ba’zi sahnalarni ijro etishdan ham uyalgan. Shuningdek, dastlabki muvaffaqiyat unga moliyaviy mustaqillik va turli xil loyihalarda ishtirok etish imkoniyatini bergan.

Qaysi sahnalarni suratga olish qiyin bo‘lgan?

Redkliff uchun franshizaning eng qiyin qismi to‘rtinchi filmdagi suvosti sahnalari bo‘lgan. Ushbu jarayonni suratga olish 6 hafta davom etgan. Chunki texnik guruh har kuni 10 soniyani suratga olishga muvaffaq bo‘lgan. Umuman olganda, aktyor filmni suratga olishda 41 soat suv ostida bo‘lgan, bundan oldin u dayving kursini ham tugatgan.

Redkliff “Uzuklar hukmdori”, Vud esa “Garri Potter” haqida qanday fikrda?

Deniel Redkliff “Uzuklar hukmdori” filmini Garri Potter ijodkorlari uchun maxsus namoyishda tomosha qildi va hamkasbining ijrosiga qoyil qoldi. Vud esa Yangi yil bayrami arafasida oila davrasida Garri Potter filmini tomosha qildi va film unga yoqdi.

Aktyorlarning 11-sentabr voqealari haqidagi xotiralari qanday?

Ikkala film ham 2001-yil 11-sentabr voqealaridan keyin ekranlarga chiqqan. Fojia sodir bo‘lgan kuni Vud Shon Bin va Orlando Blum bilan Nyu-Yorkdan Los-Anjelesga uchib kelgan va deraza orqali osmono‘par binoning qanday yonayotganini ko‘rgan. Uchuvchi yo‘lovchilarga samolyotlar terrorchilar tomonidan o‘g‘irlab ketilgani va Sinsinnati shahriga qo‘nganini aytgan. Shuning uchun ham barcha reyslar bekor qilinganligi sababli aktyorlar bir hafta davomida qolib ketgan. Fojiadan keyin Warner Bros “Garri Potter” aktyorlari uchun shaxsiy samolyotlarni yollagan.

Hozirda franshiza aktyorlarda qanday his-tuyg‘ularni uyg‘otmoqda?

Aktyorlar filmlar odamlarga yordam berishda davom etayotganidan mamnun. Redkliffning so‘zlariga ko‘ra, Garri Potter haqidagi filmning yettinchi qismidagi muvaffaqiyatsiz tryukdan so‘ng falaj bo‘lgan kaskadyor – Devid Xolmsning bir oylik og‘ir operatsiyasiga “Uzuklar hukmdori” yordam bergan. Vudning tanishiga esa Gollumning hikoyasi giyohvandlikning yengishga yordam bergan.

Vud va Redkliff ularning ishtirokisiz yaratilgan keyingi loyihalar haqida qanday fikrda?

Amazon’ning “Uzuklar hukmdori”deb nomlangan yangi seriali Vud uchun juda g‘alati tuyuldi. “Bu ‘Uzuklar hukmdori’ emas. U ikkinchi asrda, biz aytgan voqealardan ming yil avval sodir bo‘ladi”, − deydi Vud. Shuningdek, u ispan rejissori Xuan Antonio Bayonni yoqtirgani va ijodkorlar trilogiyaga nisbatan davomiylikni saqlab, suratga olish ishlarini Yangi Zelandiyada tashkil etishini ta’kidladi. Redkliff esa “Garri Potter” dunyosi kengayishda davom etayotganidan xursand. Lekin ikkala aktyor ham yaqin yillarda franshizaga qaytishni rejalashtirmayapti.