Los Angeles Times “Oltin globus” mukofotini topshiruvchi Gollivud xorijiy matbuot assotsiatsiyasining (HFPA) moliyaviy sxemalariga oid maqolani e’lon qildi. Gazetaning yozishicha, assotsiatsiya a’zolarining gonorarlari miqdori AQSh qonunchiligiga mos kelmaydi, deb xabar beradi “Kinopoisk”.
Nashr ma’lumotlariga ko‘ra, HFPA’ning 87 nafar ishtirokchisi notijoriy tashkilotlar o‘lchovi bo‘yicha juda katta miqdorda pul oladi. 2021-yilning iyunida yakunlanadigan joriy moliyaviy yil davomida HFPA o‘z a’zolariga 2,15 million dollar ajratgan. Hisob-kitoblarga ko‘ra, yanvar oyida 20 dan ortiq odam xorij filmlarini tomosha qilgani uchun 3465 dollardan olgan. Bundan tashqari, qo‘mita a’zolari safarlar sabab har oy 2310 dollardan ishlaydi, arxiv qo‘mitasi a’zolari esa 2200 dollardan, festival qo‘mitasi a’zolari — 1100 dollardan, tarixiy qo‘mita a’zolari — 1000 dollardan.
Shuningdek, maqolada yozilishicha, matbuot anjumanlar moderatorlari ham yodga olingan: ular har oy 1200 dollardan ishlab topadi. O‘tgan moliyaviy yilda veb-saytdagi maqolalar ishtirokchilarga 585 ming dollar olib kelgan.
Bundan tashqari, HFPA direktorlar kengashi tarkibiga kirganlar uchun ham yaxshigina pul to‘laydi. Uning besh nafar a’zosi 2019-yilning 30-iyunida yakunlangan soliq yilida 63 ming dollardan 136 ming dollargacha maosh olgan. Ushbu davr mobaynida direktorlar kengashi rahbari 23 ming dollardan 78 ming dollargacha olgan.
Gazetadan iqtibos keltirgan ekspertlar ushbu mablag‘larni soliqlar to‘lovidan ozod etilgan tashkilot uchun “noodatiy” deb atagan. Insayderlarning ta’kidlashicha, HFPA a’zolarining gonorarlari, taxminan, 10 yil oldin, jurnalistika bozori iqtisodiy tanazzulni boshidan o‘tkazishni boshlagan vaqtda o‘sa boshlagan.
Shuningdek, Los Angeles Times’ning qayd etishicha, “Oltin globus”ga da’vogarlar qatoriga kirish ham ko‘pincha HFPA’ning iliq munosabatlariga bog‘liq. Misol sifatida gazeta matbuotda ko‘plab salbiy fikrlar bildirilgan “Emili Parijda” serialini keltirgan — u ikkita nominatsiyada, jumladan, “Eng yaxshi komedik serial” yo‘nalishi bo‘yicha mukofotni qo‘lga kiritgan. Nashr ma’lumotlariga ko‘ra, o‘tgan yili Paramount TV HFPA a’zolarini Fransiyadagi suratga olish ishlariga jalb etgan va ularni qimmat mehmonxonalarga joylashtirgan.
HFPA’ga yaqin bo‘lganlardan biri Variety bilan suhbatda tashkilot a’zolari o‘z vakolatlari doirasida bo‘lgan xizmatlar uchun bonuslar olishini taxmin qilgan. Uning hisoblashicha, bu kabi holatda ular yollanma xodim sifatida ishlay oladi.
Bu HFPA bilan bog‘liq birinchi mojaro emas. O‘tgan yili norvegiyalik jurnalist Kyersti Flaa “Oltin globus” tashkilotchilarini o‘zini assotsiatsiya tarkibiga qabul qilishni istamagani uchun sudga bergandi. U HFPA’ni press-tadbirlarni nazorat qiladigan kartel deb yozgandi. Noyabr oyida sud jurnalistning da’vosini rad etgan.
Izoh (0)