Shavkat Mirziyoyev 18-fevral, payshanba kuni “O‘zbekiston Respublikasining Jinoyat va Jinoyat-protsessual kodekslariga o‘zgartish va qo‘shimchalar kiritish to‘g‘risida”gi qonunni imzoladi, deb xabar bermoqda “Gazeta.uz”.
Hujjatga ko‘ra, himoyachi ishtirok etishi shart bo‘lgan jinoyat ishlari qatoriga quyidagilar kiritildi:
- sud tomonidan dastlabki eshituv o‘tkazilayotgan ishlar;
- o‘ta og‘ir jinoyat sodir etganlikda gumon qilinayotgan yoki ayblanayotgan shaxslarga oid ishlar;
- shaxsga nisbatan qamoqqa olish yoki uy qamog‘i tarzidagi ehtiyot chorasini qo‘llash masalasi ko‘rib chiqilayotganda;
- aybiga iqrorlik to‘g‘risida kelishuv tuzilgan ishlar.
Bundan tashqari, Jinoyat-protsessual kodeksga kiritilgan o‘zgartirishlarga muvofiq, shaxs amalda ushlangan yoki uni jinoyat joyida ushlash bilan bog‘liq tezkor-qidiruv tadbiri amalda yakunlangan paytdan boshlab u bilan bog‘liq protsessual harakatlar amalga oshirilgunga qadar uning himoyachi bilan xoli uchrashishi ta’minlanadi.
Kiritilgan tuzatishlarga ko‘ra, tezkor-qidiruv faoliyatini olib boruvchi organlar mansabdor shaxslarining gumon qilinuvchi, ayblanuvchi yoki sudlanuvchidan ariza, tushuntirish xati yoki ko‘rsatmalar olishi surishtiruvchi, tergovchi, prokuror yoki sudyaning yozma ruxsati asosida va faqat himoyachi ishtirokida (himoyachining rad etish hollari bundan mustasno) olishi mumkin.
Shuningdek, Jinoyat-protsessual kodeksga kiritilgan o‘zgartirishlarga muvofiq, ushlab turish muddati amalda ushlangan paytdan e’tiboran ko‘pi bilan 48 soatni tashkil etadi. Ilgari bu muddat ushlangan shaxs ichki ishlar organiga yoki huquqni muhofaza qiluvchi boshqa organga keltirilgan paytdan boshlab hisoblangan.
Izoh (0)