19-fevral kuni AOKAda IIV YHXBB rahbar va mutasaddilari ishtirokida o‘tkazilgan matbuot anjumanida O‘zbekistonda 2020-yilda auksion orqali sotilgan avtoraqamlar to‘g‘risida ma’lumot berildi.
Ma’lum qilinishicha, 2020-yil davomida auksion savdolari orqali jami 98 898 ta davlat raqami belgilari sotilgan.
“Vazirlar Mahkamasining 2017-yil 31-avgustdagi 683-son qaroriga o‘zgartirishlar kiritilib, auksion savdolari orqali sotiladigan davlat raqami belgilari toifalarining soni 3 tadan 6 taga, birjaga qo‘yiladigan davlat raqami belgilari soni 65 tadan 328 taga o‘zgartirildi. 2020-yil davomida auksion savdolari orqali 98 898 ta davlat raqami belgisi, 243 milliard 185 million 752 ming so‘mga sotildi”, — deyiladi xabarda.
Shuningdek, ta’kidlanishicha, o‘tgan yil davomida yo‘l harakati qoidabuzarligi to‘g‘risida bayonnomalarni elektron tarzda rasmiylashtirish uchun 3514 ta planshet moslamalari xarid qilinib, to‘liq ishga tushirilgan.
Avvalroq 2020-yil boshidan buyon Respublika tovar-xomashyo birjasining Avtoraqam.uzex.uz veb-saytida 262,6 milliard so‘mlik 106 mingdan ziyod avtoraqam shaffof onlayn auksionlar orqali sotilgani to‘g‘risida xabar berilgandi.
Eslatib o‘tamiz, avtoraqamlarning onlayn auksionlarda sotilishidan kelib tushgan mablag‘larning 80 foizi davlat budjetiga, 20 foizi Ichki ishlar vazirligining moddiy-texnik bazasini rivojlantirish, xodimlarini moddiy rag‘batlantirish va boshqa xarajatlar maxsus jamg‘armasiga yo‘naltiriladi.
Ma’lumot uchun, 2019-yilda onlayn auksionlar orqali 156,1 milliard so‘mlik chiroyli raqamlar sotilgandi.
Izoh (0)