“Toshkent metropoliteni” UK “O‘zbekiston temir yo‘llari” AJ tarkibidan chiqariladi. Bu haqda Transport vazirligi tomonidan muhokamaga qo‘yilgan “Toshkent shahar transporti sohasida boshqaruv tizimini tubdan takomillashtirish to‘g‘risida”gi Prezident qarorida so‘z boradi.
Qaror loyihasida, shuningdek, Transport vazirligi Toshkent shahar transport boshqarmasi negizida Toshkent shahar transport bosh boshqarmasini tashkil etish belgilangan.
Hujjat bilan Transport vazirligi, Toshkent shahar hokimligi va xorijiy mutaxassislarning quyidagi takliflari ma’qullangan:
- jamoat transporti yo‘nalishlari tarmog‘ini uch toifaga - bog‘lovchi, yetkazib beruvchi va magistral yo‘nalishlarga ajratgan holda bosqichma-bosqich maqbullashtirish;
- uch toifadagi — bog‘lovchi, yetkazib beruvchi va magistral yo‘nalishlarga tabaqalashtirilgan tariflarni joriy etish;
- shahar jamoat transport korxonalarini maqbullashtirilgan yo‘nalishlarda haqiqiy bajarilgan ish hajmlaridan kelib chiqqan holda moliyalashtirish (Pool system) tizimini joriy etish. Bunda Pool system tizimi orqali shahar jamoat transporti korxonalarini moliyalashtirish manbalari etib mahalliy budjet subsidiyalari va Toshkent shahar transportini rivojlantirish jamg‘armasi mablag‘larini belgilash.
Ma’lumot uchun, “Toshkent metropoliteni” birinchi bor “O‘zbekiston temir yo‘llari” AJ tarkibiga 1997-yil kirgan bo‘lib, 24 yil davomida uning nazorati ostida ishlagan.
Mavzuga doir: Shavkat Mirziyoyev metroni rivojlantirish loyihasini oxirigacha yetkazish topshirig‘ini berdi
Izoh (0)