Шавкат Мирзиёев 18 февраль, пайшанба куни «Ўзбекистон Республикасининг Жиноят ва Жиноят-процессуал кодексларига ўзгартиш ва қўшимчалар киритиш тўғрисида»ги қонунни имзолади, деб хабар бермоқда «Gazeta.uz».
Ҳужжатга кўра, ҳимоячи иштирок этиши шарт бўлган жиноят ишлари қаторига қуйидагилар киритилди:
- суд томонидан дастлабки эшитув ўтказилаётган ишлар;
- ўта оғир жиноят содир этганликда гумон қилинаётган ёки айбланаётган шахсларга оид ишлар;
- шахсга нисбатан қамоққа олиш ёки уй қамоғи тарзидаги эҳтиёт чорасини қўллаш масаласи кўриб чиқилаётганда;
- айбига иқрорлик тўғрисида келишув тузилган ишлар.
Бундан ташқари, Жиноят-процессуал кодексга киритилган ўзгартиришларга мувофиқ, шахс амалда ушланган ёки уни жиноят жойида ушлаш билан боғлиқ тезкор-қидирув тадбири амалда якунланган пайтдан бошлаб у билан боғлиқ процессуал ҳаракатлар амалга оширилгунга қадар унинг ҳимоячи билан холи учрашиши таъминланади.
Киритилган тузатишларга кўра, тезкор-қидирув фаолиятини олиб борувчи органлар мансабдор шахсларининг гумон қилинувчи, айбланувчи ёки судланувчидан ариза, тушунтириш хати ёки кўрсатмалар олиши суриштирувчи, терговчи, прокурор ёки судьянинг ёзма рухсати асосида ва фақат ҳимоячи иштирокида (ҳимоячининг рад этиш ҳоллари бундан мустасно) олиши мумкин.
Шунингдек, Жиноят-процессуал кодексга киритилган ўзгартиришларга мувофиқ, ушлаб туриш муддати амалда ушланган пайтдан эътиборан кўпи билан 48 соатни ташкил этади. Илгари бу муддат ушланган шахс ички ишлар органига ёки ҳуқуқни муҳофаза қилувчи бошқа органга келтирилган пайтдан бошлаб ҳисобланган.
Изоҳ (0)