“Daryo” tahririyatiga Samarqand tumanining “Bo‘zi” mahallasida yashovchi fuqarolar murojaat qilib, “Shisha” qabristonidagi daraxtlar mahalla raisi boshchiligida kesib olinayotganini ma’lum qildi.
Mazkur murojaat asosida “Daryo” muxbiri Farhod Norbo‘tayev jurnalistik surishtiruv olib bordi.
Holat yuzasidan dastlab “Bo‘zi” mahallasi raisi Alisher To‘raqulov bilan suhbatlashdik. Raisning ta’kidlashicha, u qabriston ichidagi qurigan daraxtlar shoxi sinib, qabr toshlari ustiga tushayotgani sabab mahalla oqsoqollari bilan maslahatlashib, daraxtlarni kesib olib, o‘rniga manzarali daraxtlar, xususan, archa ekishni rejalashtirgan.
“Daraxtlarni kesishdan avval qishloqdagi oqsoqollar bilan maslahatlashdik. Bu daraxtlarni olib, o‘rniga archa ekmoqchi edik”, — dedi Alisher To‘raqulov.
Aytilishicha, 2021-yilning 3-fevral kuni “Bo‘zi” MFY raisi Samarqand tuman ekologiya va atrof-muhitni muhofaza qilish bo‘limiga qabriston ichidagi daraxtlarni kesish uchun ruxsat berishini so‘rab xat yozgan. 4-fevral kuni esa 7 nafar mahalla faoli ishtirokida qabristondagi daraxtlarni kesish bo‘yicha dalolatnoma tuzilgan.
O‘rganish jarayonida daraxtlar bor-yo‘g‘i 4-5 ta qabr ustiga tushib turgani, qabrlardan uzoqda bo‘lgan daraxtlar ham kesib tashlanganiga guvoh bo‘ldik. Bu holatga esa mahalla raisi joy kam qolgani, shuning uchun yangi joy ochib qo‘yish maqsadida daraxtlarni kesganini bildirdi.
“Qabristonda joy kam qolgan. Shuning uchun bu yerni ochish maqsadida daraxtlarni oqsoqollar bilan bo‘lgan yig‘ilishda dalolatnoma qilib, kesdik”, — dedi MFY raisi Alisher To‘raqulov.
Samarqand viloyat ekologiya va atrof-muhitni muhofaza qilish boshqarmasi axborot xizmati rahbari Sherali Iskandarovning ma’lum qilishicha, “Bo‘zi” mahallasida yashovchi fuqarolar boshqarmaga ham murojaat qilgan. Murojaat voqea joyiga borib o‘rganilganda haqiqatan ham “Shisha” qabristonidagi daraxtlar kesilayotgani aniqlangan.
“Biz holatni o‘rganish uchun kelganimizda qabristondagi daraxtlar kesilayotgan edi. Kelib, daraxt kesish jarayonini to‘xtatdik. O‘rganish ishlari jarayonida faqat terak daraxtlari emas, tol va mevali daraxtlar ham kesilganiga guvoh bo‘ldik. Hozir o‘rganish va surishtiruv ishlari olib borilmoqda. O‘rganishlar yakuni bo‘yicha batafsil ma’lumot beramiz”, — dedi Sherali Iskandarov.
Qabristondagi daraxtlarning kesilishiga qarshi chiqqan fuqarolarning ta’kidlashicha, mahalla raisi ekologiyadan ruxsat olganini aytib, ularni kesishga o‘zi bosh-qosh bo‘lgan. Sherali Iskandarovning ma’lum qilishicha, mahalla raisi hech qanday ruxsat olmasdan daraxtlarni kesgan.
“Mahalla raisi daraxtlarni kesish uchun hech qanday ruxsatnoma olmagan. Biz holatni o‘rganishga Samarqand tuman ekologiya va atrof muhitni muhofaza qilish bo‘limining davlat inspektorlari va inspeksiya rahbari bilan birgalikda keldik. Kelganimizda mahalla raisi va mahalla fuqarolari ham shu yerda edi. Rais bizga ekologiyadan ruxsat olganini aytdi. Vaholanki, tuman ekologiya bo‘limi boshlig‘i o‘zini tanishtirib, hech qanday ruxsat so‘rab xat kelmaganini aytganidan so‘ng uning vaji o‘tmay qoldi. Bir-ikki kundan so‘ng mahalla raisi eski sana bilan daraxtlarni kesishga ruxsat berishni so‘rab xat qilib, tuman inspeksiyasiga murojaat qilgan. Biz xatga qonuniy javob yozdik. Ammo bu vajlar o‘tmaydi”, — dedi Sherali Iskandarov.
Mutaxassisning ta’kidlashicha, agar daraxtlar qabriston yoki boshqa joyda plantatsiya shaklida ekilib, yog‘och qilish maqsadida ekilgan bo‘lsa, uni kesgan fuqaroga jarima qo‘llanilmaydi. Tabiiy holatda chiqqan yoki hududga ko‘rk berish maqsadida ekilgan daraxtlarni kesish taqiqlanadi.
“Prezidentimiz Shavkat Mirziyoyevning joriy yil 3-fevraldagi farmoni bilan respublikada davlat o‘rmon fondiga kirmaydigan daraxt va butalarning qimmatbaho navlari kesilishiga joriy etilgan moratoriyning amal qilish muddati 2021-yilning 31-dekabrgacha uzaytirildi. Bu haqda barcha OAVlarda e’lon qilindi. Shunday farmon e’lon qilinib turgan bir vaqtda mahalla raisi jarayonni ko‘ra bila turib, qo‘rqmasdan, daraxt kesmoqda. Bugun xalqimizga murojaat qilmoqchimanki, hurmatli fuqarolar, Samarqand viloyatining mehmonlari, har qanday holatda bugun tabiatimizni ko‘z qorachig‘imizdek asraylik. Daraxtlarning kesilishiga yo‘l qo‘ymaylik”, — dedi Sherali Iskandarov.
“Daryo” voqealar rivojini kuzatishda davom etadi.
Izoh (0)