Yaponiyadagi zilzilada jabrlanganlar soni 100 kishidan oshdi, deb yozadi “RBK” Kyodo agentligiga tayanib.
Ma’lumotlarga ko‘ra, Fukusima, Miyagi prefekturalari va boshqa bir qancha hududlar aholisi jabr ko‘rgan. Halok bo‘lganlar haqida ma’lumot yo‘q. Shuningdek, zilzila oqibatida 900 mingga yaqin uy elektr quvvatisiz qolgan. Ertalabga kelib, muammo hal qilingan, ayni paytda Fukusimadagi bir necha yuzta bino chiroqsiz qolmoqda, xolos.
Shoshilinch xizmatlar xabariga ko‘ra, zilziladan Fukusima, Miyagi, Ibaraki, Totigi, Saytama, Tiba, Kanagava va Gumma prefekturalarida 104 kishi jabrlangan. Ularning ko‘pchiligi yiqilib tushish oqibatida shikastlangan.
7,3 magnitudali zilzila 13-fevral, shanba kuni soat 23:08 da (Toshkent vaqti bilan soat 19:08) Tinch okeanidagi Fukusima prefekturasi hududida yuz berdi. Zilzila o‘chog‘i 55 km chuqurlikda joylashdi, yer silkinishlari Tokioda ham sezildi.
Yaponiya milliy meteorologik boshqarmasi vakili taxmin qilishicha, hodisa 2011-yilgi vayronkor zilzila oqibati bo‘lishi mumkin. Bu haqda Tokio universiteti Zilzilalarni tadqiq qilish instituti professori Kenji Satake ham aytib o‘tdi. Uning so‘zlariga ko‘ra, “o‘n yildan keyin bunday ko‘lamdagi aftershok yuz berishi ajablanarli emas”.
Seysmologlar ogohlantirishicha, yaqin haftalar ichida qaytadan kuchli yerosti silkinishlari sodir bo‘lishi mumkin. Yaponiya bosh vaziri Yosixide Suga mamlakat fuqarolariga uyda qolishni tavsiya qildi.
Izoh (0)