Yevropa markaziy banki sobiq rahbari Mario Dragi boshchiligidagi Italiya Vazirlar Mahkamasi 13-fevral, shanba kuni birinchi majlisini o‘tkazdi. Bu haqda “Interfaks” xabar qildi.
Yangi bosh vazir va 23 nafar vazir Kvirinal saroyida prezident Serjo Mattarella ishtirokidagi yig‘ilishda qasamyod qildi.
Dragi avvalgi bosh vazir Juzeppe Konte boshchiligidagi Vazirlar Mahkamasining tarkibi parlament ishonchini yo‘qotib, siyosiy beqarorlik yuzaga kelgan vaqtda yangi hukumatni shakllantirgan. Yakunda Mattarella COVID-19 koronavirus pandemiyasi sabab muddatidan ilgari saylovlar o‘tkazmaslikka qaror qildi. U buning o‘rniga Dragiga pandemiyaga qarshi kurashish va iqtisodiy muammolarni hal etish uchun siyosiy bo‘lmagan hukumat shakllantirishni topshirdi.
Dragi fevraldagi maslahatlashuvlardan keyin asosiy siyosiy partiyalarni qo‘llab-quvvatladi va Vazirlar Mahkamasi tarkibini shakllantirdi. Yangi hukumat tarkibiga texnokratlar va Italiya siyosiy kuchlarining vakillari ham kiritildi. Eski hukumatning bir nechta vakili bo‘lgan vazirlar o‘z lavozimini saqlab qolgan.
“Besh yulduz harakati” yetakchisi Luiji Di Mayo Italiya tashqi ishlar vaziri lavozimida qolgan. Mudofaa vaziri lavozimida ishlagan Lorenso Guerini (Demokratik partiya), hech qaysi bir partiyaga a’zo bo‘lmagan ichki ishlar vaziri Luchana Lamorjeze ham hukumat tarkibidagi o‘rnini o‘zgartirmagan.
Marta Kartabiya adliya vaziri, Daniele Franko iqtisodiyot vaziri lavozimiga tayinlangan. Ikkala lavozim tayinlovi ham siyosiy emas. Iqtisodiy taraqqiyot vaziri lavozimini Jankarlo Jorjetti (“Liga” partiyasi) egallagan.
Kelasi haftada parlamentda Italiyaning yangi Vazirlar Mahkamasi tarkibiga ishonch bildirish bo‘yicha muhokama jarayoni va ovozga qo‘yish amalga oshiriladi.
Avval Italiyada koronavirusning yangi shtammi tufayli cheklovlar kuchaytirilgani, Italiya mafiyasi tez yordam mashinalariga sirenadan foydalanishni taqiqlagani, fevral boshida mamlakatda koronavirusga qarshi vaksina tanqisligi kuzatilgani haqida xabarlar berilgan.
Izoh (0)