Япониядаги зилзилада жабрланганлар сони 100 кишидан ошди, деб ёзади «РБК» Kyodo агентлигига таяниб.
Маълумотларга кўра, Фукусима, Мияги префектуралари ва бошқа бир қанча ҳудудлар аҳолиси жабр кўрган. Ҳалок бўлганлар ҳақида маълумот йўқ. Шунингдек, зилзила оқибатида 900 мингга яқин уй электр қувватисиз қолган. Эрталабга келиб, муаммо ҳал қилинган, айни пайтда Фукусимадаги бир неча юзта бино чироқсиз қолмоқда, холос.
Шошилинч хизматлар хабарига кўра, зилзиладан Фукусима, Мияги, Ибараки, Тотиги, Сайтама, Тиба, Канагава ва Гумма префектураларида 104 киши жабрланган. Уларнинг кўпчилиги йиқилиб тушиш оқибатида шикастланган.
7,3 магнитудали зилзила 13 февраль, шанба куни соат 23:08 да (Тошкент вақти билан соат 19:08) Тинч океанидаги Фукусима префектураси ҳудудида юз берди. Зилзила ўчоғи 55 км чуқурликда жойлашди, ер силкинишлари Токиода ҳам сезилди.
Япония миллий метеорологик бошқармаси вакили тахмин қилишича, ҳодиса 2011 йилги вайронкор зилзила оқибати бўлиши мумкин. Бу ҳақда Токио университети Зилзилаларни тадқиқ қилиш институти профессори Кенжи Сатаке ҳам айтиб ўтди. Унинг сўзларига кўра, «ўн йилдан кейин бундай кўламдаги афтершок юз бериши ажабланарли эмас».
Сейсмологлар огоҳлантиришича, яқин ҳафталар ичида қайтадан кучли ерости силкинишлари содир бўлиши мумкин. Япония бош вазири Ёсихиде Суга мамлакат фуқароларига уйда қолишни тавсия қилди.
Изоҳ (0)