Jons Hopkins universitetining ma’lumotlariga ko‘ra, pandemiya boshlanganidan beri dunyo bo‘ylab 108 million 186 ming 991 kishida koronavirus aniqlangan.
Dunyo miqyosida COVID-19 tufayli 2 382 880 vafot etgan, bemorlarning 79 milliondan ortig‘i kasallikdan forig‘ bo‘lgan.
AQSh kasallik aniqlangan va vafot etganlar soni bo‘yicha yetakchilik qilmoqda. Mamlakatda 27 million 490 ming kishida COVID-19 aniqlangan, 480 767 o‘lim qayd etilgan. Bemorlarning 17 milliondan ortig‘i tuzalgan.
Koronavirusga chalinganlarning soni bo‘yicha Hindiston ikkinchi o‘rinda qayd etilgan. Mamlakatda pandemiya boshlanganidan buyon aniqlangan COVID-19 bemorlari soni 10,89 million kishini tashkil etdi. Bemorlarning 155 550 nafari vafot etgan, 11 millionga yaqini sog‘aygan.
Uchinchi o‘rinni esa Braziliya band qilgan. Bu yerda pandemiya boshidan beri 9 million 760 ming nafar odamda kasallik aniqlangan. Bemorlarning 237 489 nafari vafot etgan, deyarli 8,7 million nafari shifo topgan.
Ma’lumot uchun, dunyo bo‘ylab virusga chalinganlarning umumiy soni 17-dekabr kuni 74 million, 27-dekabr kuni 80 million, 4-yanvar kuni 85 million, 11-yanvar kuni 90 million, 18-yanvar kuni 95 million, 27-yanvar kuni 100 million, 7-fevral kuni 105 milliondan oshgandi.
Bundan avval Buyuk Britaniyada koronavirus bilan kasallanganlar soni 4 million kishidan oshgani, Italiyada koronavirusning yangi shtammi tufayli cheklovlar kuchaytirilishi hamda Yaponiyada pandemiya fonida yolg‘izlik vaziri lavozimi joriy qilingani haqida xabar berilgandi.
Izoh (0)