Kubada 12-fevral, juma kuni ETEKSA mahalliy telekommunikatsiya kompaniyasining aloqa markazida sodir bo‘lgan texnik hodisa tufayli butun mamlakat bo‘ylab telefon aloqasi va internet uzilib qoldi. Bu haqda “Interfaks” xabar berdi.
Mamlakat poytaxti Gavana va boshqa uchta viloyat aholisining ma’lumot berishicha, hodisa tushga yaqin sodir bo‘lgan, uzilishlar natijasida barcha internet va aloqa xizmatlari ishlamay qolgan. Xalqaro aloqa xizmatlari 90 daqiqada, internet esa 10 daqiqada qayta tiklangan.
ETEKSA telekommunikatsiya kompaniyasi “texnik nosozlik” sabab kelib chiqqan muammo endilikda bartaraf etilgani haqida Twitter’da yozgan. Kompaniya nosozlik sababini tushuntirmagan, ammo 2020-yilda mobil aloqa trafigi uch baravarga oshganini ta’kidlagan.
Ma’lumot uchun, Kubada 4,4 million kishi mobil internetdan foydalanadi. Bu mamlakat aholisining to‘rtdan bir qismiga teng.
Avvalroq Kubada ikki xil valyuta tizimi bekor qilingani haqida xabar berilgandi. Mamlakatda mahsulot va xizmatlar keskin qimmatlashishi kutilmoqda. Respublikada 1994-yildan beri ikkita valyuta amal qiladi — Kuba pesosi (CUP) va Kuba konvertatsiya pesosi (CUC). Ikkinchi pul birligi Amerika tomonidan sanksiyalar joriy etilgach, mamlakatda aylanmasi to‘xtatilgan AQSh dollarining o‘rnini bosishi lozim edi.
Izoh (0)