Buyuk Britaniyada koronavirus bilan kasallanganlar soni 4 million kishidan oshdi. Bu haqda virus tarqalishini real vaqtda kuzatib borayotgan Johns Hopkins universiteti ma’lumotlarida keltirilgan.
Ma’lumotlarga ko‘ra, o‘tgan bir sutka davomida mamlakatda yana 15 144 kishida koronavirus tasdiqlangan. Kasallanganlarning umumiy soni ayni vaqtda 4 025 574 kishini tashkil etmoqda.
Shunday qilib, Buyuk Britaniya AQSh, Hindiston, Braziliya va Rossiyadan keyin COVID-19 bilan kasallangan aholisi soni 4 milliondan oshgan dunyodagi beshinchi davlatga aylandi.
Shu bilan birga, butun pandemiya davrida mamlakatda koronavirusga chalinganlarning 2,1 millionga yaqini sog‘aygan, 116 mingdan ortiq bemor vafot etgan (o‘tgan bir sutkada — 758 kishi).
Butun dunyoda esa koronavirus infeksiyasiga chalinganlar soni 108,1 milliondan oshdi, hozirga qadar ularning 60,5 milliondan ortig‘i sog‘aygan bo‘lsa, bemorlarning salkam 2,4 millioni virus qurboniga aylangan.
Avvalroq Britaniyaga “qora ro‘yxat”dagi mamlakatlardan tashrif buyuruvchilar uchun “COVID-mehmonxonalar” tashkil etilishi haqida xabar berilgandi. Mamlakatda 15-fevraldan boshlab COVID-19 xavfi yuqori bo‘lgan davlatlardan tashrif buyuruvchilar uchun ikki haftalik majburiy karantin joriy etiladi.
Izoh (0)